همس .. التعبانين

همس .. التعبانين

الأحد، ٢٨ أكتوبر ٢٠٠٧

هكذا سنحل كل مشاكلنا بحق وحقيقى 1




مش عارف ليه أنا حاسس إن فيه حالة يأس وإحباط مسيطرة علينا..يمكن فى قلة
قليلة لسه متفائلة،لكن بصراحة مع معظم التعليقات اللى بسمعها من العديد من المواطنين فى مختلف وسائل المواصلات العامة،والهيئات الحكومية،وحتى الطلبة بتوع الحضانة حسيت إن الناس ياعينى دماغها لسعت،وجابت آخرها من الحكومة،والبلد واللى فيها..
ده حتى من يومين كنت معدى جنب سفارة الإمارات لاقيت طابور طوييييييييييييييييييييييييييل ولا كأن السفارة بتوزع لحمة مجاناً،وسألت واحد واقف عشان أستفسر على الحكاية فقال إنه جاى يعتمد شهادته من السفارة عشان يعرف يشتغل فى دبى،والغريبة إن رسم إعتماد الشهادة ب 168 جنيه ونص للعادى و200 جنيه للمستعجل..يا خراب مستعجل يا ولاد
يعنى المصريين على كده أجدع ناس يتعمل عليهم شغل برة وجوة..ده على كده حكومتنا الرشيدة اللى بتاخد 15 جنيه من طلبة الجامعة رسوم الكارنيه المعفن طلعت أجدع من أخوانا العرب اللى إحنا رايحين نترمى فى أحضانهم،ونتمرغ فى خيرهم..
المهم بصراحة ما أخبيش عليكو أنا سألت نفسى سؤال مهم جدا – من وجة نظرى يعنى – وهو إذا كانت البلد باظت،وعايزين نطفش منها بأى تمن،والحكومة حرامية،والفساد مالى كل حتة..طيب إحنا بقى كمواطنين فين دورنا لحل أزمتنا..هى الحكومة دى يعنى يا أخوانا نزلت علينا من السما مثلا على غفلة..صحينا مثلا من النوم لاقيناها كابسة على نفسنا من غير أحم ولا دستور؟؟
إحنا اللى سيبناهم ياخدوا مراكز مرموقة ويشغلوا وظائف حساسة ويقبضوا على قلبهم قد كده ويخربوا على قد ما يخربوا من غير حتى ما نحاول نتحرك أو نعترض و رضينا بسكاتنا وسلبيتنا..كل ما أتفرج بصراحة على مسلسل الملك فاروق،وأشوف أزاى كان عصر الملك اللى الثورة أقنعتنا إنه فاسد،وبتاع حريم،كان فيه نظام برلمانى حقيقى،وأفكار ليبرالية،وصحافة قوية،والأهم من ده كله شعب فاهم،ومثقف،سواء الأفنديات اللى لابسين طرابيش،أو الفلاحين اللى قاعدين ع المصطبة،أو عمال المصانع..الكل كان بيقرأ،ويتابع،ويعبر عن رأيه..كان فى مفكرين،وندوات ثقافية،ومظاهرات،وحركات،وتجمعات..ماكانش فيه حاجة اسمها منع التجمع،أو منع التظاهر..حتى القهاوى يا بشر ماكانش الناس اللى قاعدين عليها بيلعبوا استميشن،وطاولة..كان الكلام فيها عن السياسة،والتأثيرات السياسية،والاقتصادية،والاجتماعية،لأى قرار تاخده الحكومة..ساعتها بتحسر على عصرنا الحالى الذي يزعم البهوات اللى فوق أنه عصر الحريات والتعددية الحزبية وأزهى عصور الديموقراطية
عشان كده أنا فكرت..وسألت نفسى..أزاى نخرج من هذا الوضع المليء بالكساد،والركود،والسلبية،واللامبالاة،والإحساس باليأس،والضياع اللى إحنا حاسين بيهم..
وأثناء تفكيرى دار حوار بينى وبين زميلة مدونة اسمها مروة جمعة..وكان الحوار أون لاين على الماسنجر..
يا ريت تقروه،وتشوفوا حل المشكلة جه إزاى من وجهة نظرى المتواضعة،ويهمنى أعرف رأيكم فى مدى تطبيقه،وإمكانية تفاعل وتجاوب الناس معاه..
أنا دموع الملائكة،ومروة كتاكيتو


دموع الملائكة says:
بطلتى تكتبى فى مدونتك يعنى
كتاكيتو .. says:
يعنى..كسل مدوناتي عام
دموع الملائكة says:
كلنا هذا الرجل
كتاكيتو .. says:
مش عارفه.. نفسي حاجة تفرحني
دموع الملائكة says:
يبقى مش هتكتبى ولا تقرى
دموع الملائكة says:
ده حتى ميكى ماوس لا يخلو من المكائد والظلم
كتاكيتو .. says:
عندك حق
كتاكيتو .. says:
حتى ميكي
دموع الملائكة says:
ربنا يفرجها
كتاكيتو .. says:
آمين ..
دموع الملائكة says:
قوليلى يا مروة
كتاكيتو .. says:
نعم
دموع الملائكة says:
لو حبينا ننشر الوعى والفكر المستنير تفتكرى ايه هى المشكلة الاولى اللى هتواجهنا
كتاكيتو .. says:
اليأس ...ثقافة "مافيش فايدة" اللى ماشيين عليها
كتاكيتو .. says:
هعمل ايه بالفكر ..لو الفكر هيأكلني عيش ،ماشي ألف بركة ..
كتاكيتو .. says:
عارف ..الفقر مشكلة كمان
دموع الملائكة says:
اممممممممممم
كتاكيتو .. says:
عدم وجود قدوة ..ده مشكلة
دموع الملائكة says:
تعرفى؟ انا شايف المشكلة الأولى أكبر وأهم من كده
كتاكيتو .. says:
اللى هي أيه؟
دموع الملائكة says:
انا السؤال اللى سألته كان بيقول ايه؟
كتاكيتو .. says:
لو حبينا ننشر الوعى والفكر المستنير تفتكرى ايه هى المشكلة الاولى اللى هتواجهنا؟
دموع الملائكة says:
تمام
دموع الملائكة says:
لو حبينا ننشر الوعى والفكر المستنير
دموع الملائكة says:
يبقى المشكلة اللى هتواجهنا أزاى نحكم إن ده وعى وفكر مستنير؟
دموع الملائكة says:
مين اللى هيحدد الوعى والفكر المستنير
كتاكيتو .. says:
فكرك
كتاكيتو .. says:
ثقافة مجتمعك الأصيلة
كتاكيتو .. says:
دينك ..قوميتك
دموع الملائكة says:
ما أنا إذا كان فكرى ضد فكرك يبقى انتى هتشوفينى جاهل وضال وهتحكمى عليا بالجهل والغباء وهتبعدى عنى..لأننا للأسف نفتقر للغة الحوار المتحضر فى الوقت الحالىكتاكيتو .. says:
وليه مايكونش رأيي صواب يحتمل الخطأ
دموع الملائكة says:
لأن اللى حواليكى مش نفس اللى كانوا حوالين الإمام الشافعى
دموع الملائكة says:
الناس اتغيرت
كتاكيتو .. says:
تمام
كتاكيتو .. says:
مش الناس بس
كتاكيتو .. says:
أنا بدرس تربية مقارنة
كتاكيتو .. says:
النظام التعليمي هو الأساس
دموع الملائكة says:
وإذا كان الإمام الشافعى نفسه اتعمل فيه كده اومال احنا بقى هيتعمل فينا ايه من الناس اللى أفكارنا هتخالف أفكارهم
كتاكيتو .. says:
وانت شايف يا شريف نظامنا عامل ازاي
دموع الملائكة says:
عارفة بقى ما بين وجهة نظرى فى نشر الوعى،والفكر المستنير وإقتناعى إن المشكلة تكمن فى تحديد الفكر المستنير وبين وجهة نظرك ان المشكلة هى اليأس والفقر فى بين وجهتى النظر حاجة مشتركة لازم نلعب عليها
دموع الملائكة says:
عشان ننجح فى نشر اى فكر
دموع الملائكة says:
وللأسف الحاجة دى معروفة بس الأشرار بيستخدموها استخدام خاطيء


كتاكيتو .. says:
وايه هي الحاجة المشتركة
كتاكيتو .. says:
اللي الاشرار
كتاكيتو .. says:
بيستخدموها من وجهة نظرك
دموع الملائكة says:
اللعب على وتر المنفعة والمصلحةدموع الملائكة says:
اللى هيصوتوا فقرا يبقى اشتروهم بالفلوسكتاكيتو .. says:
أيوه
كتاكيتو .. says:
تمام
دموع الملائكة says:
محتاجين شغل يبقى شغلوهم
دموع الملائكة says:
عندهم مرض يبقى عالجوهم


دموع الملائكة says:
بس المشكلة مش بتتحل لأن اللعب على الوتر بيكون بالكلام وبس
دموع الملائكة says:
مجرد وعود
دموع الملائكة says:
لكن لو الفكر ده قدر يفيد اللى حواليه بجد يبقى بدأ البداية الاولى الصحيحة
كتاكيتو .. says:
مجرد وعود ..عارف المسلمين الاوائل كانوا متقدمين ليه ..لأن كلمتهم كانت كلمة راجل
كتاكيتو .. says:
الكلمة سيف
دموع الملائكة says:
المرحلة التانية بقى ودى الاهم..بعد ما هتنفذ وهتحل الازمة بجد هل ده هيبقى مجرد مرحلة وهتنتهى وخلاص ولا هتستمر فى المنفعة
كتاكيتو .. says:
امممم
دموع الملائكة says:
لو الفكر بتاعك قدر انه يفيد الناس وخلاهم يفيدوا نفسهم ويكتفوا بحل مشاكلهم ومايحتاجوش لحد يبقى فكرك فعلا فكر مستنير
دموع الملائكة says:
اما لو فكرك نفعهم مؤقتا وبعدين رجعت ريما لعادتها القديمة
دموع الملائكة says:
يبقى كل كلامك غلط او يحتوى على قدر كبير من الخطأ
دموع الملائكة says:
يبقى عشان نطلع نقول كلام مفيد لازم يقترن بتنفيذ مفيددموع الملائكة says:
وعشان يقترن بتنفيذ مفيد لازم امكانيات


دموع الملائكة says:
طب افرض مفيش امكانيات؟؟


كتاكيتو .. says:
يبقى انسف
دموع الملائكة says:
النسف،وإعادة البناء من أول وجديد ده مبدأ فولتير فى الثورة الفرنسيةدموع الملائكة says:
وغير قابل للتطبيق فى الوضع الراهن
دموع الملائكة says:
الصح بقى أنك تنور العقول وتفيد العقول والابدان
كتاكيتو .. says:
طبعا غير قابل
كتاكيتو .. says:
ماديا ومعنويا
دموع الملائكة says:
لأ قابل،بس عشان تفيد لازم يكون عندك امكانيات
دموع الملائكة says:
بس خد بالك
دموع الملائكة says:
انت عايز تعلم الناس ازاى يعتمدوا على نفسهم ويستغنوا عن خدمات اللى حواليهم
دموع الملائكة says:
يبقى احسن حاجة انك تبدأ بنفسك..يعنى تستغنى انت اولا عن خدمات وامكانيات غيرك
دموع الملائكة says:
وتخلق بنفسك امكانيات تساعدك وتساعد غيرك
دموع الملائكة says:
ساعتها فعلا يبقى عندك تجربة حية قابلة للتطبيق
دموع الملائكة says:
وتقدر بيها تفيد الناس وتعلمهم كلام عملى اكتر منه نظرى
دموع الملائكة says:
السؤال بقى..ده هيتحقق ازاى؟؟
دموع الملائكة says:
أنا شايف إنه ممكن يتحقق بالاتحاد بين الافكار والمؤهلات
دموع الملائكة says:
مجموعة شباب خريجين مثلا كلية طب..يعملوا قوافل طبية وينزلوا يعالجوا المرضى مجانا
دموع الملائكة says:
وخريجى الصيدلة ياخدوا من شركات الادوية ادوية عينات مجانية
دموع الملائكة says:
وخريجى الإعلام من الصحفيين وموظفى العلاقات العامة يغطوا الانشطة اعلاميا ويروجوا افكارهم
دموع الملائكة says:
والمهندسين يساهموا بقدر تخصصاتهم فى حل ازمات الغلابة
دموع الملائكة says:
وخريجى كليات الأداب والتربية يدوا مجموعات تقوية مجانا ولو مفيش مكان للطلبة،يبقى ممكن يدوا الدروس دى فى المساجد والجوامع والكنائس
دموع الملائكة says:
وهكذاكتاكيتو .. says:
جميل جدا ..
دموع الملائكة says:
كل واحد يتبرع بتخصصه
كتاكيتو .. says:
كل فئة في المجتمع تساهم حتى عمال النظافة
دموع الملائكة says:
بالظبط
دموع الملائكة says:
ومفيش مانع من المساهمة فى تخصص تانى غير تخصصنا
كتاكيتو .. says:
ياريت ..ياريت ..
دموع الملائكة says:
يعنى مثلا لو مهندس ميكانيكا ما لاقاش امكانية للمساهمة بتخصصه،ممكن يشرف على النظافة ،المهم محدش يقعد ساكت
دموع الملائكة says:
المهم ان كلنا نتحد بتخصصاتنا ومؤهلاتنا..واهو فرصة نبقى لحقنا القطر مادام البلد بتتحرك
كتاكيتو .. says:
هههههههههههههههههه
كتاكيتو .. says:
توووووووووووووووووووووووت
دموع الملائكة says:
يالا الحقى نطى


دموع الملائكة says:
بس المشكلة دلوقت مين هو اللى هينفذ
كتاكيتو .. says:
مين ..
كتاكيتو .. says:
الشباب
كتاكيتو .. says:
احنا يعني
دموع الملائكة says:
ازاى بقى نلمهم ونقنعهم بالتنفيذ
كتاكيتو .. says:
نفسي اعرف
كتاكيتو .. says:
لما يبقى العمل الجماعي قيمة
كتاكيتو .. says:
هنقدر نلمهم
دموع الملائكة says:
انتى عارفة بقى عشان نعرف نلمهم محتاجين لأيه بجد؟؟؟
كتاكيتو .. says:
لأيه
دموع الملائكة says:
لرجال الدين
كتاكيتو .. says:
مالهمش مصالح
دموع الملائكة says:
لو الفكرة دى اتقالت فى اكتر من خطبة جمعة والشيخ طلب من المصلين تدوين اسمائهم وبياناتهم فى الجامع..كل واحد يدون تخصص ومدى استعداده للمشاركة بتخصصه،وطاقته،وفى نفس الوقت كل واحد يدون أزمته ومشكلته،ونبدأ بعد كده نحصر المشكلات،والطاقات،والتخصصات ونوفقهم مع بعض بحيث إن كلنا نحل أزمتنا ونفس الحال فى الكنيسة..تخيلي لو كل سكان كل حى أو مركز،أو نجع عملوا كده..كلنا ممكن نحل أزمتنا ونثبت للحكومة أننا لينا دور،ومش سايبين كل حاجة عليهم وخلاص
دموع الملائكة says:
يبقى مع الوقت كلنا هنقرب من بعض،وهنتعلم،ونستفاد،ونبدأبقى نراقب العمل الحكومى،ونتابع تنفيذ تصريحات الحكومات،ونبقى صحينا من غفلتنا
كتاكيتو .. says:
عارف ..
كتاكيتو .. says:
هيتقبض عليهم
كتاكيتو .. says:
ويقولوا عليهم محرضين
كتاكيتو .. says:
ومخربين
كتاكيتو .. says:
أصلي عايشت رجال دين زي الورد ،وفشلوا للأسف
دموع الملائكة says:
يبقى إذن لازم نمشى فى اتجاهين .. اقناع رجال الدين واقناع رجال الامن
كتاكيتو .. says:
اقناع رجال الأمن ؟
دموع الملائكة says:
اه
كتاكيتو .. says:
ولو قلت لك ان المنظومة كلها محتاجة اعادة بناء
دموع الملائكة says:
مش ممكن نبدأ من الأول خالص فى الهدم والبناء..أعتقد إننا لازم نصلح خطوة خطوة..عموما تخيلى مثلا انا روحت مبنى مديرية امن القاهرة وروحت لرئيس الحى بتاعنا
دموع الملائكة says:
وروحت للمسئولين وطلبت منهم متابعتنا وإعطائنا الفرصة لحل مشكلاتنا بأنفسنا
دموع الملائكة says:
ده اللى أنا بفكر فيه دلوقت
دموع الملائكة says:
اختبار ارض الواقع
كتاكيتو .. says:
و تفكير راق .. لازم تلاقي ارض واقع ,,وناس كماندموع الملائكة says:
ليه مانحاولش اننا فعلا نروح لقادة الرأى وصناع القرار ونقول لهم لو محدش قادر يساعدنا ادونا فرصة اننا نحاول نحل مشاكلنا بنفسنا
دموع الملائكة says:
وتحت راعايتكم واشرافكم
كتاكيتو .. says:
يا ريت يكونوا كده
دموع الملائكة says:
بدل ما حد يتهمنا بعمل تنظيمات سرية والتستر على اهداف خفية
كتاكيتو .. says:
دول فكرهم في حاجات تانيه
كتاكيتو .. says:
انت طيب ..طيب جدا
كتاكيتو .. says:
تفتكر هم ليه مش بيحاولوا يصلحوا الحال
كتاكيتو .. says:
مش بحبطك
كتاكيتو .. says:
ياريت ياريت تحاول
كتاكيتو .. says:
بقولك حاول ومش هتخسر
كتاكيتو .. says:
هتضاف لتجاربك
كتاكيتو .. says:
روح لصناع الرأي والقرار
كتاكيتو .. says:
وشوف رأيهم
دموع الملائكة says:
فى نظرية بتقول انهم بيحاولوا يشغلوا الناس بالفقر والمرض والبطالة عشان محدش يتلهى بالسياسة ويتدخل فى الحكم ونظرية تانية بتقول انهم جهلة ومش حاسين باللى الناس فيه لأنهم بيمارسوا مهامهم الوظيفية فى مكاتب مكيفة وحراسات خاصة ومواكب فاخرة بفلوسنا
دموع الملائكة says:
انا بقى عايز اشوف بنفسى..هل واحدة منهم صح ولا ى نظرية تالتة لسه محدش يعرفها
دموع الملائكة says:
مش هنخسر حاجة يا جماعة من التجربةكتاكيتو .. says:
انت صح
كتاكيتو .. says:
عايز تتأكد
كتاكيتو .. says:
بدلا من نظرية "الناس بيقولوا"
دموع الملائكة says:
بالظبط
كتاكيتو .. says:
ربنا يوفقك


يا ترى بقى بعد هذا الحوار أنتوا أيه رأيكم؟
منتظر تعليقاتكم
shiko_4u@hotmail.com

الخميس، ٢٥ أكتوبر ٢٠٠٧

ختمت كام مسلسل فى رمضان


كعادة كل شيء يخضع للتطور حتى "الحاجة الساقعة"، تطور ذلك السؤال التقليدى " ختمت كام جزء من القرآن فى رمضان هذا العام؟ " الذى طالما سأله لنا العديد من الشيوخ،والدعاة،فوق منابر المساجد،أو فى برامج التليفزيون،والفضائيات،وأصبح السؤال البديل " ختمت كم مسلسل فى رمضان هذا العام؟ " !!
وإذا كان السؤال التقليدى الأول يسأله العديد من الشيوخ،والدعاة،فالسؤال الثانى "الروش" الذى طاله النيولوك ستجده فى العديد من برامج المنوعات،والجرائد،والمجلات الفنية،وكله فى نخب الإسلام،والمسلمين،وإذا كان رمضان لله،والتليفزيون للجميع،فيا مرحبا بالأخوة المسيحين الذين يشاركوننا مشاهدة هذه "الفخفخينا" المعتبرة من المسلسلات الكوميدية،والاجتماعية،والدرامية،والتاريخية، وفرصة أن نزايد على الوحدة الوطنية بين نسيجى الأمة ،وتحيا مصر ورقصنى يا جدع بمناسبة هذا الشهر الكريم المفترج !!
أكثر من 30 مسلسلاً تليفزيونيا بوجوه مصرية،وسورية،تملأ أوقات كافة القنوات الأرضية فى ماسبيرو،والفضائيات،وعلى رأى المثل "ساعة لربك،و30 ساعة للتليفزيون " مع إن اليوم فيه 24 ساعة فقط،إذن فلندعو الله عز وجل فى ليلة القدر أن يجعل اليوم 31 ساعة حتى يكفينا اليوم لمشاهدة الثلاثين تحفة فنية التى يترك من أجلها الفنانين،والفنانات كل متع الحياة الدنيا على مدار العام،ويطحنوا نفسهم فى الاستديوهات،لتخرج لنا إبداعاتهم،فى صورة مسلسلات تكتسح أولويات حياتنا فى هذا الشهر الكريم المبارك،أما الساعة المتبقية فهى الساعة التى سنذكر فيها الله ونحن نأكل فى وجبتى الإفطار،والسحور،وأيضاً سيتم ذلك ونحن أمام التلفزيون،وعديها الناس لبعضيها،وإن الله غفور رحيم يا جدعان.
وبالنظر إلى أخوانا الصعايدة،سنجد أنهم تحولوا إلى "سبوبة" أو "نحتاية" بلغة ولاد الكار، حيث أن أى سيناريست مش لاقى فكرة،يقوم يعمل عمل عن الصعايدة، حتى أن المسلسلات التي تناقش مشاكل صعيد مصر تحتل نصيب الأسد لدرجة إن أكثر من عشرة مسلسلات تحكي عن الصعيد بشكل أو بآخر، وبمتابعة المسلسلات الصعيدية نرى أن مخرجين مسلسلات الصعيد فشلوا بشكل كبير من الناحية الواقعية فى تجسيد صعيد مصر، وهذا الخطأ يقع فيه معظم كتاب ومخرجو مسلسلات الصعايدة التى تعبر عن مهزلة وخطأ بحق صعيد مصر، فلم ينقل أحد هؤلاء الكتاب نظرة صحيحة عن صعيد مصر،وكان للشاعر الكبير عبد الرحمن الابنودي موقف بمقاطعة المسلسلات الصعيدية، وقال "هذه الأعمال تتم كتابتها في مكاتب مكيفة، وتجعلني أشك في صعيديتي، وكأنني لم أعش في الصعيد ولم أخالط أطفاله ونساءه، كتاب الأعمال الصعيدية أنسوني الصعيد الذي عشته، وعلينا أن نعزي شخصية الصعيدي ونستقبل الشخصية الجديدة التي صنعها لنا كتاب الدراما"
أما الشيء الأكثر مدعاة للتعجب،والاستغراب،والإندهاش فى الذاكرة،أن معظم هذه المسلسلات جائت معظم أحداثها،ومشاهدها مليئة بقدر عالى من الكآبة،والحزن،والبكاء،والعويل،بشكل ينافس أحداث نشرة التاسعة مساءا فى فقرتى فلسطين،والعراق،فنور الشريف فى"سعد الدالى" أبنه أتقتل يا رجالة،وخد له كام طلقة هو كمان،رغم إنه وزير جامد جدا،وبيتعمل له ألف حساب،ويحييى الفخرانى فى "حمادة عزو" مهدد بالإفلاس والسجن،والواد أبنه إبراهيم عزو كان عايز يقتله،ويحرق قلب ماما نونا عليه،ويسرا فى قضية رأى عام تعرضت للإغتصاب،والممرضة بتاعتها بقت حامل،وزميلتها الدكتورة قتلوها،وحتى حسين فهمى الفنان المحترم ذو الأصل الأستقراطى سولت له نفسه فى "حق مشروع" أن يقتل أخوه،أبن أمه،وأبوه..يااااااه..دى القيامة لازم تقوم يا جدعان،ووسط كل هذه الأحداث المليئة بالدم،والغم،خد عندك بقى يا معلم،كمية لا بأس بها من الصراخ،واللطم على الخدود،وشق الجيوب،وخير اللهم أجعله خير،مسيرها هتروق وتحلى فى الحلقات الأخيرة،محدش يخاف يا جماعة،دى بس شوية إشتغالات من السادة المؤلفين،لزوم المط،والتطويل،حتى تصل الأحداث لثلاثين حلقة،على مقاس عم رمضان،أومال يعنى هما هيملوا التلاتين حلقة منين؟ من ترعة بلدنا مثلاً؟ وبعدين يعنى هو السادة المشاهدين هيعرفوا أكتر من المنتج اللى دفع أشى شيء،وشويات قول حوالى 4،3 مليون جنيه للفنان الفلانى،والفنانة الفلانية، عن دورهم فى مسلسل من المسلسلات، يبقى لازم الفنان الفلانى،والفنانة الفلانية يعملوا بلقمتهم،ويحللوا الأجر الكبير اللى لهفوه،ومرحب شهر الصوم مرحب،لياليك عادت بسلام.
نيجى بقى للسادة الفنانين والفنانات اللى كتر ألف خيرهم،غرقونا بأعمالهم الفنية على مدار الشهر الكريم،ويعنى خلونا من غير ما يقصدوا نغلط كام غلطة ع الماشى كده، زى مثلا إن معظمنا لا نزل يصلى التراويح،ولا حتى صلاة الجماعة اللى بتساوى فى رمضان 70 فرض من الأيام العادية،ولا عدم قراءة المصحف،ولا حتى المناهج الدراسية،و...عموما دى كلها حاجات بسيطة،بس أنا كان فى سؤال محيرنى،والحمد لله لاقيت إجابته منشورة فى أحد موضوعات "وشوشة"..لما إحنا سيبنا القرآن،وصلاة التراويح،والجماعة،والتهجد،وقيام الليل، وقعدنا فى بيوتنا قدام التليفزيون نتفرج على المسلسلات،يا ترى بقى السادة الفنانين،والفنانات عملوا أيه فى هذا الشهر الكريم ؟ يا ترى قعدوا هما كمان قدام التليفزيون؟ الإجابة طبعا "لأ" عارفين ليه؟ عشان معظمهم طلع يعمل عمرة فى الأراضى المقدسة،وكل عام وأنتم بخير.
شريف عبد الهادى


shiko_angel@yahoo.com


shiko_4u@hotmail.com





الخميس، ١١ أكتوبر ٢٠٠٧

حبيتها بعد وفاتها


مش شرط كل إنسان ،حبيناه ،أو أعجبنا بيه،نبقى عرفناه عن قرب،أو قابلناه فى يوم من الأيام..فأنا شخصيا أبطالى المفضلين عرفتهم من كتب التاريخ اللى كتبت عنهم،أو كتبهم اللى كتبوها بأيدهم،وزرعوا فيها خلاصة تجاربهم،وأفكارهم،وأقوالهم المأثورة ،عشان تجنى الأجيال اللى بعدهم حصادها،ويعم الخير على الجميع..
دلوقت॥بعد صلاة الفجر وأنا قاعد أتجول بين عشرات المدونات،فوجئت ببوست فى مدونة أخى الكريم أشرف توفيق صاحب مدونة أخف دم،مكتوب فيه "البقاء لله..الله يرحمك يا
شيكو " فأستغربت،وأندهشت،وقولت لا يكون الواد أشرف توفيق أتجنن وبيفول عليا أنى مت،حاكم أنا أصلى واطى،وقليل الزوق،وغصب عنى والله إعداد برنامج الناس وأنا خدنى وبعدنى عن الاتصال بأقرب الناس لقلبى،فيمكن يكون اشرف بحكم خفة دمه أعتبر أنى مت، قال يعنى كأنه أتبرى منى وهيحرمنى من الميراث،وكتب اللى كتبه،عشان أشوف كده فى مدونته،فأتصل بيه،وأعتذر عما فات،لكن كلمة شيكو كان معاها لينك،فضغطت عليه،وفوجئت بى داخل مدونة غريبة لم أزرها من قبل



الحق أقول لم تمض ثوانى حتى شعرت بألفة غريبة،وكأننى فى مدونتى الشخصية،التى أشخبط فيها على الكيبورد،كيفما أشاء॥الموسيقى الحـزينة المليئة بالشجن..الألوان البسيطة الهادئة.. تصميمات الجرافيكس الأنيقة..الجملة الترحيبية التى تقع عليها عيناك فور دخولك المدونة " منورين فى القعدة تملى " ..عنوان أول بوست " غياب لأجل يعلمه الله "..بعدها وجدت عينى ترمح رغما عنى فى سطور المدونة التى أخذت تلقينى لأسفل من سطر لسطر،وإلى اليسار من كلمة لكلمة..وجدتنى أقرأ كل فكرة،وأنا أصفق فى قلبى،وروحى التى أنسجمت مع الأفكار والتعبيرات راحت تسبح بعيدا ولكن لأول مرة تسبح فى عالم الواقع،بعد أن أعتادت أن تسبح دوما فى عالم الخيال..الواقع المر الذى أكسبته هذه المدونة فى دقائق معدودة فور دخولى إليها لأول مرة حلاوة لم أذقها من قبل فى أى مدونة أخرى..وفى البوست الثانى الذى كان بعنوان " مرايا ووجوه " قرأت :


هل سبق ونظرتم داخل مرآة نفوسكم؟ انه اختبار صعب لايقدر عليه الا من يستطيع مواجهة هذا العالم بكل ما يحمله من صراعات وظلام ومخاوف
فى محاولاتى للبحث عن وجهى الحقيقى -الذى ضاع بين كم هائل من الاقنعة التى امتلكها واُشهرها فى وجه من اريد وقتما اريد- اكتشفت انى لا اجده او فلنقل نسيت ملامحه
وجدت اقنعة لم اعرف ان كنت قد ارتديتها من قبل ام اجهزها لحينها اقنعة اعتدت على بعضها وكرهت الاخر

هذا القناع اعرفه جيدا انه قناع ضعفى وطيبتى امام من احب هذا القناع اعتز به كثيرا الا انه طالما ارهقنى وهمشنى جعل منى ظلا للاخرين فلا اظهر ابدا تحت الاضواء جعلنى دائما اتحمل الخطأ واحمل نفسى فوق طاقتها
وما هذا القناع؟ انه بغيض اكرهه واتمنى ان ألقيه فى اقرب سله مهملات قناع الزيف والنفاق وكم ألبسه انا وغيرى فى سباق طموحاتنا التى لا نهاية لها ولكنه يجعلنى بعد ذلك اشعر بالاشمئزاز منى وممن حولى ورغم ذلك فانى لا استخدمه كثيرا فلا اعتقد انه وجهى الحقيقى والا كنت انسانه منفرة
قناع ثالث وما اكثرهم !! قناع العيب والحرام قناع بلى من كثر استعماله فى زمن لا يستخدم هذا القناع الا المتأخرون غير مواكبى التقدم والعولمة وحتى هذا القناع احاول الا البسه كثيرا حتى لا اوصف بالتخلف والرجعيه

وهذا القناع الملقى فى اخر الحجرة قناع الرومانسية وقد نالنى منه ما كفانى فليبقى بعيدا
قناع دست عليه بقدمى انه قناع اليأس واظن انى فعلت الصواب فاذا اردت ان اصل لوجهى الحقيقى لابد ان ابعد قناع اليأس عنى
لقد تعبت من كثرة البحث وعناء رؤية كل تلك الاقنعة والان يبقى السؤال هل مازلت احتفظ بوجهى الحقيقى ام اننى فقدته الى الابد؟ هل وجهى الحقيقى مكون من كل تلك الاقنعة معا فلا يمكننى ان البسها منفصله؟
هل انا وحدى التى يجب ان تبحث عن وجهها الحقيقى ام ان العالم من حولى ايضاً يلبس اقنعة ؟
واخيرا الى كل من يهمه الامر فقد فقدت وجهى الحقيقى من يجده له عندى مكافأة مجزية


هكذا تحدثت صاحبة المدونة عن ضياع وجوهنا الحقيقية وسط ألاف الأقنعة الزائفة التى نرتديها..أعجبت بها..أحببتها..أردت أن أعبر لها إمتنانى البالغ لكل ما فعلته معى فى هذه الفترة القصيرة..نظرت إلى يمين المدونة فوجدت الشات بوكس الذى طالما وجدته فى عشرات المدونات التى زرتها من قبل،ضغطت عليه لأكتب تعليقى،وقبل أن تتقافز أصابعى على الكيبورد بسرعتها المعهودة،إذا بالصدمة الرهيبة تستوقفنى،وتعتصر كيانى..عشرات الجمل،والكلمات التى ترثى شيكو،أو شيماء صاحبة المدونة،وتطلب لها الرحمة،والمغفرة
الآن فقط تذكرت لماذا قال أشرف توفيق صاحب مدونة أخف دم البقاء لله الله يرحمك يا شيكو
الآن فقط تذكرت أننى دخلت هذه المدونة لأعرف من المقصود بالبقاء لله،ومن الذى توفى
لقد ماتت شيماء المدونة الشابة التى تبلغ من العمر ثمانية وعشرين عاما والأغرب أنها ماتت بعد شفائها من مرضها،وها هى بعد رحيلها لازال عدد كبير يتعرف علي مدونتها لأول مرة،ويبدى إعجابه بأسلوبها،وأفكارها،وصدمته التى فوجيء بها عندما أراد أن يعلق فى الكومنت فإذا به يجد فى التعليقات عبارات الرثاء والوداع،ودعوات الرحمة،والمغفرة،فيعبر عن صدمته الرهيبة،ويحذو حذو الجميع فى طلب الرحمة والمعفرة॥
وعبر صفحة التعليقات على آخر بوست كتبته الراحلة شيماء،تابعت تواصل المدونين معها فى مرحلة مرضها وردودها عليهم،وشكرها لهم على مؤازرتها فى رحلة مرضها،وكأنا تودعهم،فى أيامها الأخيرة..وفجأة أنقطعت ردود شيماء عليهم لأجد هذا التعليق :
السلام عليكم أنا أحمد أخو شيماء(شيكو) صاحبة هذه المدونة أعزائي ضيوف المدونة أعلمكم بأن شيماء توفيت إلى رحمة الله تعالى ليلة النصف من رجب وكانت قد أوصتني أن أعلمكم بهذا الخبر وأن أسألكم أن تقرأوا لها الفاتحة وتدعو لها بالمغفرة والرحمة ونظرا لعدم معرفتي بكلمة المرور الخاصة بها فقد دخلت وكتبت هذه الرسالة ضمن التعليقات أقسم عليكم بالله أن تدعو لهارحمك الله ياشيماء وأسكنك الفردوس الأعلىموعدنا الجنة إن شاء الله
هكذا فى لحظة واحدة أنتهى الأمرهكذا ورحلت إنسانة نبيلة صاحبة فكر مؤثر،وكلام مستنير..رحلت لتبقى فى الذاكرة والوجدان بعد رحيلها ..رحلت ليكتشفها الكثيرون ويدخلوا مدونتها ويعلقوا على كتابتها،ويدعون لها بالرحمة والمغفرة..
لقد بكيت عليكى يا شيماء بدموع من دم،وأنتحبت عليكى،وزاد إنتحابى كما لو أننى كلما أنتحبت أكثر سأفوز بجوائز أكثر..
ومثلما تركت كتاباتك أثرا بالغا فى نفوس كل من تابعوها،ترك رحيلك أثرا بالغا فى نفوس كل من لمست فى تعليقاتهم كل هذا الحب والصدمة،وهول الفراق

لقد أبهرتنى كتابات كل المدونين الذين أهدوا إلى روحك الطاهرة كلمات خالصة لوجه الله لا تعرف الزيف أو الرياء
و مر أمام عيناى شريط عمرى كله وأنا فى مدونتك الكريمة،لأتذكر كيف أستغللت الأنترنت أسوأ إستغلال..كيف أتخذت من مواقع الهاى فايف،والفيس بوك وسائل للتعارف غير الشريف مع العديد من ذوى النفوس الضعيفة القذرة،وأنا منهم..
ها أنا الآن أمسح من قائمتى كل فتاة غير شريفة،وكل علاقة آثمة
ها أنا الآن أرى وفاتى فى مدونتك،وأتسائل من الذى سيزور مدونتى فى غيابى،وبعد رحيلى..ترى هل سيسعدنى الحظ بأن يدخل أخى،أو أختى ويخبروا الجميع بوفاتى،وهل إذا حدث ذلك سيتأثر بكتاباتى،ورحيلى كل هذا الكم الهائل الذين تأثروا بكتاباتك،ورحيلك يا شيماء..
من الذي يعرف كلمة سر مدوناتنا،وكلمة سر بريدنا الألكترونى المليء بالعديد والعديد من أسرارنا ..
يا رب أرحم شيماء وجازها بالحسنات إحسانا وبالسيئات عفوا وغفرانا
وأرحمنا إذا صرنا إلى ما صارت إليه..
أرزقنا قبل الموت توبة وعند الموت شهادة،وأجعل خير أيامنا يوم نلقاك فيه يا رب العالمين
وأخيرا أتقوا الله يا عباد الله..فالدنيا فعلا زائلة،وزائر الموت سيأتى فى لحظة خاطفة نحسبها بعيدة ويراها قريبة..
أنظروا إلى صفحات الحوادث ونشرات الأخبار فى جوه القتلى والشهداء..لقد كانوا بشرا مثلنا يملأ أعينهم الأمل والأحلام..بداخلهم رغبات،وأمانى،وأشواق،وألام،وفى لحظة واحدة أنتهى الأمر،وصاروا مجرد حالة فى المشرحة،ومجرد مرحوم أو مرحومة ضمن ملايين الأموات الذين نمر فوق قبورهم دون أن نميز منهم أحد
لا إله إلا الله..محمد رسول الله
يفنى العبد ويبقى الل
ه

يستكمل
شريف عبد الهادى فى لحظة صدق