وبعدها يا مصر؟؟

أقول لمين يا عمى ؟

لصاحبى ولا قرشى؟

واللا اللى معاه مصلحتى؟

ومين معاه المصلحة؟

كفايا واللا الوطنى؟

الأخوان واللا القبطى؟

--------------------------------------------------------------------------------------------------------------------------------------------------------------
واحد صاحبى قاللى المدونات خرجت عن هدفها لأن المدونات اتعملت فى بلاد برة أصلا عشان كل مدون يكتب يومياته لكن احنا هنا فى مصر بنكتب سياسة ووجع دماغ وكلام فاضى وكل ده مش هيغير حاجة لأن كل اللى يمكن يتقال اتقال ومفيش فايدة من الكلام
استغربت وتنحت وقبل ما أزعق له فكرت..هو صح ولا غلط؟ بجد مكنتش لاقى الرد المناسب عليه
هل هو سلبى؟ولا واقعى؟ولا ايه بالظبط

أبويا خاف عليا وقال وحياة أومك هتتقفش,ومحمود صديق عمرى قاللى لا أنت صاحبى ولا أعرفك..هتحبسنا يا ابن المفكوكة بدماغك اللاسعة,رغم إنه أكتر واحد مش عاجبه اللى بيحصل .. صديقتى المخلصة مى اللى عرفتها من النت قالت لى خاف على نفسك،هيثم أبو عقرب قال لى أنا زهقت وأحمد عطا الله مش فالح غير فى الشعر الرومانسى أو الحزين وبس وقاللى أبعد عن السياسة , وأيفون نبيل قالت لى مش هعمل مدونة من أصله , ومحمد فتحى المعيد بتاعى
وأستاذى وقدوتى قال المدونات ما بقتش زى زمان،والعرب فعلا زى ما نزار قبانى وصفهم مجرد ظاهرة صوتية
قولت أقفل المدونة لاقيت نفسى أدمنتها

اتعلمت من الصحافة المكتوبة والمرئية إن الرقم هو الفيصل بين تصريحات المسئول والواقع الفعلى ،والحقيقة إن كلام المسئولين بعيد كل البعد عن أرقام الواقع..عم إبراهيم عيسى ياما شتم وخلانى سخنت ع الآخر.لغاية ما طلعت منى ريحة شياط وفى الأخر كله على مفيش..أستاذ عادل حمودة كتب وانتقض بأسلوبه الجميل الحالم الممزوجة فيه الأحلام بالأوجاع لدرجة إنى نزفت من كلماته,وفى الآخر على مفيش

عمنا أحمد رجب ياما أتريق بخفة دمه وكلامه القليل اللى يغنى عن ألاف السطور وفيه الخلاصة,وياما وقعت على قفايا من كتر الضحك وفوقت من الضحك على دموع وبرضه كله على مفيش

الصعيدى مصطفى بكرى بلهجته وتلقائيته,وقلبه اللى اتوجع خلانى أمسك النبوت وأفكر أكسر بيه دماغ المسئولين الكدابين لكن برضه لاقيت نفسى باخد قرار أنا مش قده فجبت ورا وتراجعت واكتشفت إنه على مفيش

عم محمود سعد بخفة دمه وصراحته فى البيت بيتك عرض شكاوى الغلابة وعم مفيد فوزى اتحمق وطلع اللى جواه على بلاطة وبرخامة ورزالة,وغلاسة أشهد إنها أجمل غلاسة ورزالة حبتها فى حياتى وفى النهاية على مفيش

الناس اتعودت تقول على مواضيع الصحافة " ده كلام جرايد " يعنى زى قلته،وأنا راجل صحفى,يعنى ماليش لازمة،والجورنال اللى بكتب فيه ساعات مش بيرضى ينشر مواضيعى,أو يحذف منها جمل وكلمات عشان سقف الحرية عندهم واطى,وخايفين المكان يتقفل..طب وبعدها؟

وبعدها يا مصر؟

حياتنا أيه لازمتها،لا احنا بنعمل لك حاجة،ولا أنتى عندك حاجة تعمليها لنا ..طب أقفل مدونتى؟؟

بجد أدمنت قراءة التعليقات..أدمنت ناس كتير حبتهم وحبونى من عالم وهمى غير ملموس,ومحدش يعرف التانى فيه فى الواقع ..ناس اتعودت إن مفتاح الوصول إليهم بوابة الأنترنت وجهازى التعبان
الحب الرقمى والصداقة الكمبيوترية هما سمة العصر وأنا إنسان عصرى
بجد بجد بحبكم والله العظيم
بجد بجد مبقتش قادر استغنى عنكم والمهم كمان انكم مش هتقدروا تستغنوا عن التعليقات ولا عن تواصلنا مع بعض رغم إن مفيش فايدة فى كل ده

مش عارف أنا دمى تقيل ولا واقعى؟

مش عارف هتشتمونى وتقولوا أنت رخم أو متشائم ولا هتقولوا الله ينور عليك؟

لكن على الأقل بكرة نقول لولادنا وبناتنا كنا زمان يا ولاد الكلب وأحنا قدكم كنا بنحاول نوصل رسالة غضب جيل وأحزان أمة
لكن أدينا كبرنا وعجزنا ولسه زى ما أحنا وأنتوا زى ما أنتوا
يا رب يا رحمن يا رحيم
احنا بنحاول نعمل اللى علينا بجد لكن لسه مفيش فايدة ومش عارفين الغلط على مين
رحمتك بينا يوم الحساب
يمكن تكون الحسنة اللى عملناها فى المدونات إننا تحاببنا فيك
ويكون جزاتك إنك تظلنا بعرشك يوم لاظل إلا ظلك
بحبك يا رب
وبهدى مدونتى ليك وبعلن فيها إنى قليل الأدب ووحش وغلطان

بينى وبينكم بخاف من ربنا أوى

على فكرة .. هو عارف كل حاجة

سامحنى يا رب أنا الغلطان

سامحنى يا رب أنا الغلطان

غلطان على نوايا حقيرة جوايا وانا بتمنى أعلق موزة سمعت إنها سهلة وممكن تتجاب..غلطان على سوء استخدام للنت فى وقت بمجرد ما كنت بشوف فيه اسم بنت كنت بسعى أنى أتعرف عليها لأغراض غير شريفة وعلى فكرة كل الولاد كده بس كله بيمثل ويعمل نفسه أخ فاضل ومحترم

سامحنى يا رب على صرخة غضب فى وش أبويا أو أمى

سامحنى يا رب على أى قلة أدب فى حق واحد نرفزنى أو مسئول خنقنى

سامحنى يا رب على كل الأفلام الـ (أن كات ) اللى شوفتها على الكمبيوتر قبل كده وبالمناسبة لسه عندى شوية ما شوفتهمش.سامحنى على أوقات سمعت فيها الآذان وكبرت دماغى وفضلت مشغل الموسيقى,ومخلتش عندى دم ودخلت اتوضيت وصليت ركعتين

سامحنى على أخطاء كتير عملتها من غير وعى او قصد ومش فاكرها دلوقت عشان أعتذر عنها أو يمكن مش عارف أصلا أنها غلط وممكن أفاجأ بيها محسوبة عليا سيئات يوم القيامة وأفضل أصرخ وأقول ماكانش قصدى،ما كنتش أعرف

سامحنى يا رب انا الغلطان

أستر عليا يوم الحساب
بجد بحبك يا رب وبحب مصر وبحب كل المدونين
اهدينا يا رب برحمتك وساعدنا نعمل حاجة
بس المهم تكون ايجابية

يا رب