العفاريت مالهاش فى السياسة

بعد أن علم العبد لله ( المغلوب على أمره ) إن إخوانا فى مباحث أمن الدولة بيتحروا عنه لأنهم شاكين إنى مربى دقنى وليا انتماءات دينية متشددة وإن الموضوع داخل على مشاكل ووجع قلب ،وبعد إنسحابى المشرف ومسح البوست الكامل اللى جاب الزعل ( وربنا ما يجيبش زعل تانى ) بينى وبين رئيسنا المحبوب وحكومته النظيفة ورجال مباحث أمن الدولة الشرفاء



قررت طبعا أنسحب وما أتكلمش فى السياسة تانى لأنى غلبان وعلى قدى لكنى أفتكرت أيام زمان ساعة ما كنت لسه طالب جامعى غاوى شقاوة وصحافة ومغامرات صحفية رغم إنى ساعتها لاكان ورايا ضهر يحمينى أو حد يقف معايا لو اتشديت ودلوقت بعد ما كبرت ووضعى تغير وبقي ليا معارف وضهر بقيت أخاف أكتر من الأول على الأقل على ماما وبابا لأنهم كبروا فى السن وماما جالها القلب وحلفت إنى لو حصل لى حاجة هتموت فى ساعتها


تعالوا معايا نشوف مغامرة صحفية بتؤكد إن السياسة جزء لا يتجزأ من حياتنا



مغامرة كنت عملتها فى موقع بص وطل فى باب اسمه عفاريت خاص بالشباب الصحفى المطرقع اللى غاوىالمغامرات والوصول للحقيقة مهما كان التمن بقيادة كاتب الشباب الشهير دكتور نبيل فاروق اللى كان بيشرف علينا ويختار لنا أفكار المغامرات الصحفية اللى ننزل نعملها مع شارط بسيط جدا


لو اتقـفـشتوا أنا ما أعرفكوش

إشتغالات شعبية بتوقيع العفاريت الشقية
العفاريت مالهاش في السياسة..طب و الشعب أيه ظروفه؟
أيه الوضع الدولي يا بلدينا؟ بتشجع مين و بتكره مين؟
العفاريت كان هيغمي عليها لما واحد قالها انا بحب الرئيس الجديد

أنت ليك في السياسة؟
سؤال بسيط و عادي بس جرب تقوله لحد ما تعرفوش..ده لو عايز تشوف الرعب و القلق في ملامحه بعد ما كان عامل نفسه 10 رجالة فبعض..أو لأنه مضايقك و عايز تصرفه عنك بأي طريقة و تخليه يختفي..
يعني نبعد عن السياسة و نغنيلها زي بقيت الخلق ؟و لا نتكلم و نروح ورا الشمس؟ و لا الديموقراطية حق من حقوقنا و هتحمينا من الكبار؟
الكلام كده كتير و المفروض نقلل من المقدمات الطويلة و نخش في المفيد عشان كده( بص وطل علينا ) وشوف العفاريت عملت ايه..

الوضع الدولي يا بلدينا

بالرغم من أن السياسة هي المؤثر الذي يتلاعب بحياتنا و يغيرها إما للأفضل أو للأقبح إلا أننا كشعب اقترب من ثمانين مليون نسمة مازلنا لا ندرك ذلك

الدولار غلي و الأسعار بقت نار..سياسة..الشرطة بقت عصبية مع الشعب و في مشاكل كتير بتحصل..سياسة..المواصلات النهاردة زحمة موووت يظهر إن في تشريفة معدية..سياسة.. بحبك يا حبيبتي و لكن لا أجروء علي التقدم لأهلك لطلب يدك لأنى مش لاقى أكل.. خلاص نعمل رجيم يا حبيبى مع بعض ..برضه سياسة..كل شيء في الحياة قائم و متعلق بالسياسة..لكن بالله عليك هل تدرك ذلك؟ و إذا كنت تدركه فهل تطبقه؟
إتخنقنا إحنا العفاريت من كده و جبنا آخرنا و روحنا للعفريت الكبير د.نبيل فاروق و هوووووووب أعطانا أوردر بالمغامرة..يعني الضوء الأخضر..حته لغات برضه..المهم إننا نزلنا الشوارع نسأل الناس عن السياسة و الناس طبعا ما سكتتش.. يا نهار أبياااااااااااااااااااض.. كان يوم ما يعلم بيه إلا ربنا

(بائعة الليمون)

هل يا تري الست العجوز الجالسة علي الرصيف أمامها حبات الليمون و تأمل من كل قلبها أن تعود لأولادها الغلابة و معها جنيهات قليلة هي حصيلة بيعهم ليس من حقها أن تتكلم في السياسة زي البهوات الكبار اللي بيطلعوا في التلافازيون(علي حد قولها)؟
أقتربنا منها و قبل أن ننطق بحرف واحد..
- في ببريزة و في بريال
- يا حاجة إحنا كنا عايزين نتكلم في حاجة تانية
- مفيش فصال.. في ببريزة و في بريال
- يا ستي حنشتري منك الليمون بس قوليلنا الأول أنتي ليكي في السياسة و لا لأ؟
- ما تحاولش معايا.. في ببريزة و في بريال و لو مش عاجبك.. ( بدأت تفوق و تركز في السؤال و عنيها فتحت و القلق بان علي وشها) أنا بحب السياسة و بكره إسرائيل
- طب بتحبي أيه في السياسة؟
- كلها حلوة.. كل السياسة حلوة و البلد حلوة و أنتوا كمان شلة حلوة
- طب أيه رأيك في قرارات القمة العربية الأخيرة بمنع بيع الليمون في الشارع
- حلوة و ...نعم ..حسبي الله و نعم الوكيل..لازم نشوفلنا تربة نتاوي فيها بعد كده بقي..
- طب بتنصحي رئيس الوزارة بتاعة الليمون بأيه؟
- لازم يساعدونا و كمان لازم يعرفوا إننا غلابة و إن الليمون فاتح بيوت ناس غلابة
و قبل أن نستكمل الكلام فوجئنا بصوت جهوري أجش و رجل بملامح فظة و كأنه نبت من الأرض بغتة و هويقول " مش لاقيين غير بتاعة الليمون و بتسألوها؟ أنتوا مين و عايزين أيه؟ و ازاي معندكوش نظر و مش شايفين الناس المثقفة عشان تسألوهم؟)

( عم المثقف )

كانت ملامح الرجل لا تبشر بالخير لذلك لم يكن هناك مانع من ارتداء قناع الغلابة الطيبين و أجبنا بأدب بالغ
- يا فندم احنا صحفيين حضرتك.. و بنعمل تحقيق عن الوعي السياسي و اللي ما يعرفك يجهلك..ممكن نتعرف؟
- أنا محمد بتاع الإزاز ( الزجاج يعني) و مثقف و بفهم في السياسة ..تقدروا تتكلموا معايا.
- أنت أيه رأيك في القمة العربية؟
- احنا عايزين واحد زي عبد الناصر عشان يلم العرب
- طب عبد الناصر كان اشتراكي..انت اشتراكي؟
- اه
- يعني شيوعي؟
- ها؟
- طب انت بتشجع الريبرارية؟
- لا .. وحشة..
- و ايه مصدر ثقافتك؟
- كتب الدين و السياسة لكن دلوقتي مفيش دين
- بس في حصص ألعاب
- لا انا ولادي مش بيلعبوا..
- و لا بيتمرجحوا؟
- لا ..و كمان خليتهم يسيبوا المدرسة
- ليه يا حاج؟
- كان التعليم كويس ايام عبد الناصر لكن دلوقتي لأ فطلعتهم
- هما كانوا بيتعلموا من ساعتها و لسه ما خلصوش؟
- لا انا بتكلم علي ولادي الصغيرين اما الكبار اللي كانوا ايام عبد الناصر خلصوا
( الناس اتلمت علينا كأننا في خناقة و صاحوا فيه )
- مش كده يا عم محمد.. أنت كده مؤبد أو إعدام..خاف علي نفسك يا راجل
- بس محدش ليه دعوة.. انا مش بخاف
- طب يا حاج محمد انت ايه رأيك في الكوندارسيا؟
- مين؟
- يعني الطبقة الحاكمة
- يعني كله لازم يحكم فعلا
- ( في سرنا) و الله يا عم محمد انت راجل طيب و لا في حاجة اسمها كوندارسيا و لا ريبرارية( أما أمامه فقد ابتسمنا بهدوء و قلنا) احنا هنحاول نوصل صوتك للمسؤلين يا عم محمد شكرا علي أرائك الجادة

( ما باليد حيلة)

ظننا أن الوضع سيختلف إذا سألنا أحد الشباب و بالفعل توجهنا إلي (إبراهيم) الذى يبلغ من العمر ثمانية عشر عاما ويبيع أحذية أطفال و كانت بتاعة الليمون أرحم
- ليك في السياسة يا إبراهيم؟
- يعني نص نص
- طب ايه النص اللي بتحبه
- هز رأسه قائلاً ( أمسكوا نفسكوا كويس) بحب الرئيس الجديد
- بتحب فيه أيه؟
- بحب فيه أنه كويس
- طب مين هو الرئيس الجديد؟

- الرئيس احمد نظيف

- طب هتنتخب مين في انتخابات الرئاسة اللي جاية؟
- هو كل الناس بتحب الجديد و عشان كده انا هجدد للجديد
- طب بمناسبة الكلام عن الناس..انت شايف ان الناس واخدة حريتها
- الناس مش بتتكلم
- يعني بقها متخيط؟
- اه
- ايه نوع الخيط اللي مخيطين بيه؟ يا تري حرير و لا ستان و لا أيه النظام؟
- خيط الحرية
- طب كنا عايزين ناخدلك صورة مهمة يا هيمة .. عايزينك تظبط نفسك كده عشان هناخدلك صورة ما باليد حيلة
- يعني اضحك و لا اعمل ايه؟
- اعمل ما باليد حيلة كد هو ( طبعا انت هتشوف الصورة بنفسك فمش لازم نحكيهالك و بلاش تفاصيل مملة)
- هو أنتوا مين؟
- إحنا صحافة يا هيمة
- يعني هروح في داهية ؟

- أطمن أنت بخير طول ما إحنا معاك
- طب الحمد لله

( فعلا بتنجان)

و بعد..
كانت هذه نماذج قليلة و حقيقية فى مجتمعنا المغيب و هذا ما يبشر بكارثة ॥
فأن تتجاهل بائعة الليمون السياسة هذا أمر طبيعي لكن أن يدعي (بتاع الإزاز) العمق و السياسة و الدين بدون سند حقيقي أو أن يكون هناك شاب يبلغ من العمر 18 سنة و بيشجع الرئيس الجديد فهذا هو الخراب المستعجل..
خراب أمة أبتليت لا من الغرب أو من الغزو..بل أبلت نفسها بنفسها بعد أن مات العلم و أختفي الوعي السياسي و كله بيقول( يالا نفسي)..
فالسياسة يا سادة ليست حكرا علي أحد و ليس هناك ما يمنع من أن تفهم بائعة الليمون في السياسة أو أن يدرك شاب في الثامنة عشر من عمره أن هناك فرق بين (رئيس الوزراء الجديد) و ( رئيس مصر)..
ليس من حقنا أن نتبري من إنتمائنا للشعب المصري بحجة إنه بتاع فول لأننا ببساطة جزء من هذا الشعب..
و إن لم نبدأ في الوعي السياسي بأنفسنا فليس من حقنا أن نلوم الأخرين..
يا تري وصلت؟ ولا لسه ما وصلتش؟