همس .. التعبانين

همس .. التعبانين

الأحد، ١٧ يونيو ٢٠٠٧

عندما تصبح المدونات كلام زى قلته 1



دعونا نتفق أن المدونات خرجت عن هدفها الأصلى،وأصبح الكل بيحكى فى


المحكى،ونصب معظم - ولا أقول كل -المدونين من أنفسهم،قضاة،وجلادين،ومفتين،وعلماء،وخبراء سياسيين،وعلماء نفس،واجتماع،بلا أى سند أو حجة،أو دليل دينى،وعلمى،وعقلى


الكل ينتقم من الحبيبة مصر،والتى لا أشكك أنها قست،وتجبرت كثيراً على أولادها،وطحنتهم طحناً،لكن ما لم نلمسه لها من عذر أنها فعلت ذلك دون قصد،أو عمد بعد أن وثقت فيمن لا يستحقون الثقة


الكل يسب،ويلعن،ويندد،ويشجب،ويستنكر،ويدعو للثورة،والتمرد،رغم أننا لو أنصفنا،وتأملنا واقعنا المذرى لوجدنا أننا السبب الأول،والأخير قبل أن تكن مصر،أو مسئوليها هم السبب


فمن الذى أعطى بجهله،وأميته، وصمته،وسلبيته،واعتقاده فى الخرافات،وسمح لهذه الأوضاع من السيطرة على مجتمعنا الطيب،ونهب خيراته،وانتهاك حرماته؟؟


من الذى سلم زمام الأمور لهؤلاء،من الذى جهل بحقوقه،ووجباته،ولم يعد يعرف ما له ،وما عليه فى هذه البلد،وكأنها ليست بلده


فيا ريت الشعب ما يزعلش من الحقيقة عندما أتسائل
حد فاهم حاجة في مصر؟

بما أننا نشهد في هذه الأيام المفترجة تطوراً ملحوظاً يطرأ علي المجتمع المصري – حسب كلام المسئولين- سواء بعد تعديل المادة (76) من الدستور و معاصرة أول إنتخابات رئاسية علي أرض مصر و التي أعقبتها إنتخابات مجلس الشعب الأخيرة التي مرت بكل شفافية و نزاهة ( حسب كلام الجرائد القومية), وبما أننا في أزهي عصور الديموقراطية و النهضة و التنمية و ( العبور إلي المستقبل) فقد قررت أن ألقي نظرة عابرة علي أحوالنا في ظل هذا الإنفتاح و التحضر الذي نعيش فيه -- بس إحنا مش واخدين بالنا -- و أفرح بقي عن حق و استحقاق بالفهم و التنوير الذي ملأ عقليات المصريين و أنا أري مدي التحضر الفكري و النمو الثقافي الذي أنتشر و تفشي بيننا و أقول بكل فخر و إنبهار و أنا غير مصدق نفسي " ده أيه النور ده؟"..
تسألوني – و ده من حقكم-- " إزاي هتعرف؟" هجاوب ببساطة شديدة " هسأل نفسي و هسأل كل المصريين الأسئلة التالية و أكيد طبعا إجابتهم ستفضح أقصد ستوضح أننا فعلا نتقدم و نتحضر و نتمختر كمان"॥
كم عدد الذين يحملون بطاقات إنتخابية فى مصر؟
ما الفرق بين مجلس الشعب و مجلس الشوري؟
- ما الفرق بين السلطة التشريعية و السلطة التنفيذية و السلطة القضائية؟
- يعني أيه حزب و كم هي عدد الأحزاب الموجودة في مصر؟
- ما هي وظيفة رئيس الوزراء و ما هي إختصاصاته؟
- كم وزارة عندنا في مصر و من هم الوزراء الذين يرأسوا هذه الوزارات؟
- ما الفرق بين الأنظمة الشمولية و الأنظمة الليبرالية و الأنظمة الإشتراكية و أيهم يحكمنا الآن؟
- ما هي حقوق المواطنة ؟
- ما هي مواد الدستور الذي يحكمنا و يبين ما لنا و ما علينا؟
- ما هي عقوبة الواسطة في مجتمعنا؟
- هل نأخذ حقوقنا في أقسام الشرطة؟
- هل نحن شعب ( بتاع شغل) و يتمتع بالضمير المهني و الأخلاقي؟
- هل عندما نذهب لقضاء أي مصلحة حكومية نلتزم بالنظام و الصف؟
- هل جربنا أن نذهب لمصلحة حكومية فأجبرنا الموظف علي دفع ( الشاي) أو ( الحلاوة) أو أي مصطلح أخر في قاموس (البقالة) عندنا في مصر؟
- هل نحترم المرور ؟
- هل نطبق أدني حدود الذوق و اللياقة و أدب الحوار في تعاملاتنا الشخصية؟
- هل يأخذ ضعيفنا حقه من القوي؟
- هل لو وجدنا أحدا يعاملنا بذوق و أدب نُقدر ذلك أم نركبه ،ونتعالى عليه؟
- هل علينا ديون خارجية؟
- هل نعاني من عجز في الموازنة العامة؟
- هل الدخل القومي في مصر يكفي لسد إحتياجات المواطن؟
- كم عدد المواطنين الذي يعيشون تحت خط الفقر في مصر؟
فهل الإجابة ستوضح أننا شعب مظلوم ومغلوب على أمره وأن الحكومة هى الظالمة المفترية على هذا الجمع المسكين الذى رفع شعار ما باليد حيلة أم أننا فى حاجة إلى البكاء على خيبتنا التقيلة وتسببنا فى هذا الجهل والهوان الذى دفنا أنفسنا فيه بفعل سلبيتنا وجهلنا ولن تتغير أوضاعنا ولن تحترمنا حكوماتنا إلا بعد ثورة اجتماعية نصحح فيها أوضاعنا المقلوبة وموروثنا الضخم من الجهل والعادات والتقاليد الرجعية ونفوق بقى ونبقى شعب فاهم وواعى ويعرف كيفية استغلال تلك المنحة الألهية العظيمة المتمثلة فى العقل بدل ما إحنا بتوع بليلة




صباح الفل يا مصر
شريف عبد الهادى




هناك ٣٥ تعليقًا:

only spot يقول...

عندك حق كبير فى الى انت قولته بس ازاى ممكن الشعب يوعى ويهتم ببلده ويطالب بحقه
هو ده الاهم لما يوصل حال الاسر للوقوع تحت خط الفقر بمراحل كبيره يبقى من الصعب انك تتكلم معاهم وهم جعانين ومش لاقين ياكلو عن حال البلد الرد الطبيعى الى هيجوبوك بيه حاجه من الاتنين يا عم احنا مالنا بحال البلد هو احنا لاقين ناكل احينى النهارده وموتنى بكره
والدليل الهرجله الى حصلت الايام الى فاتت ايام خيبة الشورى وانا قاصده الكلمه السابقه لما وصل الصوت لقيمة مائة جنيه ببعض الدوائر الفقيره
والحل التانى انهم هيسكتو وهيعبروا عن الخيبه بالحصره
يا عزيزى ازاى هتتكلم مع الناس عن حقوق الانسان وهى بتتنهك
ازاى هتطلب من الناس انهم يكون عندهم وعى وطنى وهم لاقين كل حاجه بالمقلوب
مع العلم ايضا ان نسبه الاميه والجهل عاليه جدا فى مصر بالمناسبه انا مش بفتى الكلام ده موثق من منظمات كبيره ان الفقر والاميه عاليه جدا
يا عزيزى مش كل المصرين بيدخلو نت ويتثقفو ولا كلهم بيهتموا بشئون البلد والى بيحصل
العيب مش عليهم لوحدهم ولا على الحكومه
المثل قال ايه فرعنك يا فرعون مالقتش حد يردنى

عمرو غريب يقول...

كلامك صحيح مائة في المائة واتفق معاك بس انا عاوز اوضح حاجة لكل مدون ان اي انسان فية عيوب ومميزات بس للاسف اي واحد بيجي يكتب بيكتب العيوب و بنتجاهل المميزات وانا اتفق ان مصر فيها عيوب بس معلش في مميزات بردو في مصر تحياتي لك واتمني لك التوفيق عمرو غريب مدونة بيت الرياضة

malak يقول...

انا متفقة مع كلام عمرو جدا اه مصر فيها عيوب كتيرة يمكن مميزاتها اقل بكتير من عيوبها بس لازم نتكلم عن العيوب والمميزات معا
تحياتى

Marwa Friday يقول...

صباح الورد..يا مصر يا جميلة ..
عندك حق يا شريف غيما قلت ..قد أوافقك الرأي في أننا لا نعرف الكثير عن وطننا ..أو عن الطريقة التى من المفترض أن يدار بها ! تعرف أساس ولب الإنتكاسة تكمن في أن مصر لا يوجد بها نظام تعليمي ..هو نظام خاوي على عروشة ..كيف يعرف الشعب هذه الاشياء إلا إذا كان للعلم أصلا قيمة كبيرة ؟..طبعا أعرف إن عملك الصحفي في بص وطل مركز على باب (تعليمخانة ) ..بنظرة سريعة للمناهج -بما فيها مناهج التاريخ - تجد أنها مناهج لا ترقى إلى أن تكون (نص كم )! ..وبالنسبة للسلطات والنظام الحاكم وخلافة ..أحب أبشرك
إن هذا الكلام لم يدرس على مدار المناهج الدراسية جمعاء إلا في الصف ..-إوعى تتصدم- الخامس الابتدائي ! ..أخيرا ..أعتقد إن الاشتراكية انتهت ..النظام الذي يحكمنا الآن يا شريف هو النظام "الليبرالي" نسبة إلى (لب..رالي) ..نظام سياسي يهدف إلى القزقزة ! ..صباح العسل يا مصر ..! ا

أسامه يوسف يقول...

شعبنا يا شريف بلا فخر بيفكر فى حاجات تانيه وهى زى ماقالonly spot الفقر والجوع
شعبنا بيفكر إزاى يوفر بمبلغ ضئيل أكل ولاده ويدفع فلوس الدروس ويدفع فواتير المياه سيبك من التليفون ياعم
إزاى راجل شاغل دمتغه بهذه الأمور وهى مهمه فعلاً عاوزه يبقى مثقف تجاه حقوقه
مش تقارنا بالناس بره دول عالم عايشين متزبطين وفايقين للحاجات دى
فلازم طبعاً شعبنا يفوق من همومه لهموم تانيه وتالته ورابعه ولما يروق شويه يفكر فى حقوقه وده بعد 200 سنه
وأنا متفائل وطبعاً حكومتنا بتعمل اللى على مزاجها ماحدش هايحاسبها وتقول اللى تقوله
والمصيبه إن العالم بيصدق والدليل حصولنا على مقعد فى مجلس حقوق الإنسان

بعد الكلام ده أنا استحق أكون من ضمن القائمه السوداء من البلوجرز اللى انت ذكرتها فى الأول

تحياتى واتمنى ماتتأخرش علينا

فبركة يقول...

only spot
-----------------------------------
لا أتفق معكى فى أن الشعب المطحون الممحون الواقع تحت خط الفقر يجب أن يهتم فقط بلقمة عيشه،وأكله وشربه ودمتم
معنى كلامك إننا هنفضل طول عمرنا فى هذا الوضع المتدهور لأن مفيش أمل فى إننا هنكسب فلوس كتير تغير وضعنا

الحل يا عزيزتى إننا نتمرد عن الدور اللى اترسم لنا ببراعة وإحنا بننفذه ببراعة أكتر
الحل إننا مانبقاش عايشين زى أكياس الجوافة اللى فى وطن اتباع من زمان
إشمعنا مش فالحين غير إننا نهتم بكل كبيرة وصغيرة بتحصل فى البيوت اللى جنبنا فى المدينة والريف
لكن اللى بيحصل فى البلد ملأ السمع والبصر محدش بيحاول يتناقش فيه
مشكلتنا فى الجهل والغباء وانعدام التعليم

حتى زمان كان الجهلة والأميين بيسمعوا الراديو ويحللوا الأحداث ويشيلوا حكومة ويعينوا حكومة

ده الفرق بين زمان ودلوقت
وده اللى لازم يتغير

فبركة يقول...

عمرو غريب
-----------------------------------
فعلا يا عزيزى مصر فيها عيوب كتير لكن فيها مميزات تانية مش بناخد بالنا منها
وأهم ميزة إننا شعب كيس جوافة
يعنى ممكن نتعمل عصير ونتقدم فى طبق
الرك على الشعب يا عمور

فبركة يقول...

malak
-----------------------------------
لو هنتكلم عن المميزات يا ملك فأهم ميزة لازم نقولها إننا مالناش دور ولا بنهش ولا بننش
ناس طيبين قوى

فبركة يقول...

مروة جمعة
-----------------------------------
فعلا أكبر مشكلة عندنا بتكمن فى النظام التعليمى عشان كده الدولة كتر خيرها عملت البرامج التعليمية هدية للشعب
بس المشكلة إن الدولة نسيت تجيب مترجمين صم وبكم
صباح القزقزة والفرفشة
كليبات بقى

فبركة يقول...

أسامة يوسف
-----------------------------------
مالكش حق تقول إنك من قائمة البلوجرز السودا
ويكفى إنك بتحاول تفهم
دى خطوة مبدأية مهمة يا سمسم
ربنا يوفقك

أخف دم يقول...

ربنا يكرمك يا شريف على البوست الجميل ده وفعلا احنا بنعانى من عدم استغلال الحرية الممنوحة لنا .. رغم اننا مالناش اى عامل فى وجود الحرية دى .. احنا بناخد اللى يتعطف علينا بيه الغير وكمان بنسيء استغلاله وبنعتقد اننا بقينا عنتريين على الفاضى .. وكله بيشتم .. حتى ولو كان على جهل أو حتى عن علم لا يسمن ولا يغنى من جوع ..
ربنا يكرمك تانى ..وصدقنى مصر بخير

memo يقول...

انا متفق معك ولكن ان يكون فيها مميزات أو عيوب




تحياتي لك بالتوفيق

غير معرف يقول...

أنا متفقة معك على أن الشعب المصرى وصل إلى حالة كبيرة من السلبية واللامبالة والجهل ،لكن هذه الحالة لم يصل اليها من فراغ.. لكن أوصله اليها النخبة الحاكمة نتيجة الديكتاتورية التى تمارس عليهم،ونظم التعليم الفاشلة،والفقر ،والمرض والأمن الذى أصبح هو السلطة الحاكمة وترفع عصاه فى وجه كل من يعترض على نظام الحكم
غير أن الناس فقدت القائد الذى يستطيع أن يقدهم فى مواجهة الظلم والأستبداد

عندى سؤال خارج الموضوع بخصوص المدونة الخاصة بى،منذ فترة أحاول أن أنشر أى تدوينة لكن للأسف لاتنشر وتظهر رسالة
URL contains illegal characters
يا ريت لو تعرف السبب وأزاى أعالج الموضوع تقولى

Haitham Abu Akrab يقول...

يا اخي سبحان الله اول مره اقراك حاجه بضمير من
زمان النحت اللي انت فيه
ع العموم يا شريف انا بعتب عليك
ليه تكتب بضمير
لما ممكن تكتب نحت ؟؟؟


فين ايامك يا شيكو وحشتني ياد

عاشقة الوطن يقول...

شريييييييييييييف
انا جيت
وخلصت امتحانات أخيرااااااا

بالنسبة للبوست اللى انت كاتبه
فعلا احنا كلنا بنهاجم مصر ومحدش بيدافع عنها
بس انا اصلا ناوية ان شاء الله أكتب وأغير فكرة النقد المستمر
يعنى ممكن مرة أنقد ومرة أشوف الحلو وأقوله
بس معتقدش ان الحلو فى مصر كتير بالعكس قليل

المهم احنا هنعمل اللى علينا وخلاص
وربنا يهدى مصر المجنى عليها من غير ذنب

يالا ياشريف مش عاوز حاجة مستنياك تنور مدونتى كلها

سلااااااااام

صاحب البوابــة يقول...

مقال جميل وفكرته عميقة

تحياتي لقلمك الحر

يا مراكبي يقول...

أولا أشكرك على زيارتك ليا وإنتظارك الصبور لحد ما آجي هنا

ثانيا .. الموضوع اللي إنت قريته عندي ده كان التالت والأخير من ضمن سلسلة مترتبة عمدا .. وهي

أم الدنيا
http://yamarakby.blogspot.com/2007/04/blog-post_14.html#links

مصر أم الدنيا مرة تانية
http://yamarakby.blogspot.com/2007/05/blog-post_18.html

وإحنا نايمين
http://yamarakby.blogspot.com/2007/06/blog-post_21.html#links

**********

ثالثا .. نخش في الموضوع بقى

أي شعب في الدنيا بينقسم إلى ثلاثة فئات: الحكام .. والطبقة الوسطى المتعلمة المثقفة .. والشعب المطحون وهم الغالبية في العدد

تتسم طبقة الشعب أو الغالبية بأنهم ذوي مستوى محدود من الثقافة والإدراك .. ينشغلون ليل نهار بالسعي وراء الحصول على الإحتياجات الأساسية من مأكل ومشرب .. وإذا حصلوا على ذلك يفكرون بعدها في الملبس .. وبعدها في تعليم أولادهم وهكذا .. وبالتالي فإن إنشغالهم بأمور الحكم والثقافة والإدراك يكون متأخرا في الأهمية لأنهم مشغولون بما هو أكثر ضرورة من وجهة نظرهم

هذه الطبقة الشعبية موجودة في كل دول العالم .. لكن شكلها العام يختلف بإختلاف مستوى الدولة المادي .. وكلما توفرت الإحتياجات الرئيسية لهم كلما صعد إدراك الشعب نحو أفاق أكبر من المعرفة تتخطى حاجز المأكل والمشرب

********

تتميز الطبقة الوسطى المثقفة بأنها الطبقة التي من المفترض أن تؤثر في ذلك الشعب .. فهم من يشرحون ويترجمون ويستطيعون أن يحركوا هذا الشعب .. وهنا أصل الحكاية

فإذا نجح الحكام في أن يقلصوا ويهمشوا من دور هذه الطبقة كلما دانت لهم البلاد كما يشاؤن

يعمل الحكام علىي أن يضغطوا على أغلب أفراد طبقة المثقفين ليسقطوا في غياهب الطبقة الشعبية فينشغلون بالمأكل والمشرب .. فتفقد البلاد تدريجيا أي شكل من أشكال المقاومة والثقافة وتبدو لنا كما تبدو الآن: أغلب الناس سلبيون لا يشاركون ولا يتحركون وفقط ينتقدون على إستحياء دون أي فعل

*********

ولهذا السبب يقول البعض - كما قلت أنت في هذا البوست - أن التغيير يكون بأيدينا نحن وليس بيد الحكومة

لكن الحقيقة أن الحكومة هي التي نجحت في أن تجعل هذه الطبقة الوسطى هكذا عن تخطيط وبإقتدار .. فأصبح المأكل والمشرب هو الأولوية لمعظم أفرادها وبالتالي إنعدمت حركة المجتمع ككل

************

ومن المؤكد أنك ستسأل عن الحل .. فيؤسفني أن أقول أن كل الحلول المتاحة أو المنظورة ستكون مصحوبة بتضحيات مختلفه ومؤلمة ولا غنى عنها .. ولن يتجه المجتمع كله إلى التحرك إلا بعدما يزداد الضيق أكثر وأكثر .. وتتلاشى الطبقة الوسطى تماما .. ثم يعقبه الإنفجار

مع خالص تحياتي وشكرا على الدعوة

koukawy يقول...

اولا انا مش من المدونين اللي انت اتكلمت عليهم الحمدلله رحم الله كوكو عرف قدر نفسه
بالنسبه للأسئله بقي .. اه طبعا احنا شعب مش بتاع شغل و لا نحترم اي انواع من االأدب و اللياقه في التعامل
و اللي بيبقي محترم بيتركب و بيدلدلوا رلاجليهم كمان
و طبها علينا ديون متلتله
عقوبه الواسطه المكافأه
الدخل القومي بيكفي لدرجة الشحاته
و بنحترم المرور احترام محصلش لأنه لو حصل في بلد تانيه هياخد بالجزمه سوري يعني
و بالنسبه بقي للألتزام بالصف في المصالح الحكوميه احنا بنلتزم بيه فوق دماغ بعد صف بس رأسي
سوري طولت عليك بس انت اللي جبته لنفسك و سألت

vision يقول...

بوست جميل قريتو لللأخر...وهروح اراجع معلومات واعرف الى مش عارفاه انا لسه فاتحه بوقى لم اقفلو هقوللك

vision يقول...

لآ مش بوست جميل صحيح ده جميل جدا جميل اوى.....

فبركة يقول...

أخف دم
-----------------------------------
فعلا يا صديقى نحن نأخذ فتافيت الحرية التى ينعم علينا بها الآخرون
والمصيبة أننا لا نستغلها بشكل إيجابى أو سليم

أما بخصوص إن مصر بخير فأخشى أنها بعافية شوية
وأم كلالا ولدت يالا نروح لها

فبركة يقول...

memo
-----------------------------------
وأنا كمان متفق معاك بمناسبة إنك متفق معايا
لكن المهم هل الشعب يتفق معنا؟؟
هل المدونين متفقين معنا؟؟

فبركة يقول...

شبابيك عربية
-----------------------------------
حتى لو كان الشعب وصل إلى هذه السلبيات بفعل
"النخبة الحاكمة نتيجة الديكتاتورية التى تمارس عليهم،ونظم التعليم الفاشلة،والفقر ،والمرض والأمن الذى أصبح هو السلطة الحاكمة وترفع عصاه فى وجه كل من يعترض على نظام الحكم
غير أن الناس فقدت القائد الذى يستطيع أن يقدهم فى مواجهة الظلم والأستبداد"
حسب كلامك من أيضا المسئول عن تدهور هذه الاوضاع وطغيان النظام؟
إنه الشعب ايضا يا عزيزتى
الشعب هو الأساس

فبركة يقول...

هيثم أبو عقرب
-----------------------------------
فعلا أنا من زمان مشغول بالنحت زى ما أنت بتقول
بس النحت اللى فى ساقية الصاوى زى ما قال احمد عطا الله لميدو

وانت فاهم وانا فاهم
واحنا الاتنين فاهمين
نياهاهاهاها

فبركة يقول...

عاشقة هذا الوطن
-----------------------------------
حمد الله على سلامتك من الامتحانات

معلش يا بنتى سيف على رقاب العباد وكله لازم ياخد نصيبه
وفعلا مصر مجنى عليها
بس فى مصر تانية جانية ووحشة ومزعلة الناس
خلينا مع المجنى عليها احسن

ومستنى منك تنورينى دايما يا قمر

فبركة يقول...

صاحب البوابة
-----------------------------------

كلك زوق وكفاية عليا اوى كلمة

قلمك الحر

ده شرف اتمنى انى استحقه

فبركة يقول...

يا مراكبى
-----------------------------------

أنت راجل عملاق وحب المدونين ليك ولمدونتك مش من فراغ لكن مع احترامى
اسمح لى اقولك ان دور النظام فى القضاء على الطبقة المتوسطة لم يكن لينجح إلا بتقاعس من الشعب بكافة فئاته

فالشعب هو مصدر كل السلطات يا عزيزى

فبركة يقول...

koukawy
-----------------------------------
ربنا يخليكى لمصر
بسم الله ما شاء الله عليكى
ياختى كميلة وعارفة كل حاجة
شطورة وعقبال ما الناس تبقى فى شطارتك

فبركة يقول...

camira girl
-----------------------------------
طب بسرعة روحى راجعى اللى مش عارفاه علشان الجرس هيضرب
وبمناسبة بقك المفتوح ولسه ما قفلتيهوش
انصحك تفضلى فاتحاه بس المهم تقولى ما يستحق ان يقال وما يضيف جديد لكل مدون ومدونة
ودى حاجة انا حاسسها فيكى

مستنى منك كل ما هو جيد وجديد

memo يقول...

اية يا اخ فبركة هو انتا مبئتش تكتبلي
لية ولا عشان انا كتبتلك مرة واحدة يبقي خلاص


وشكرا

heba يقول...

هو كان ايه هدف المدونات الأصلي غير ان كل واحد يكتب اللي هو عايزه في الصفحة الخاصة بيه من غير بقى ما يدور

بس الصراحة مينفعش نقعد نتكلم وخلاص ده لو كان حجر كان زمانه نطق

بس كان لازمته ايه بس الإحراج اللي في الآخر ده الأسئلة دي صعبة اوي

تائهة فى أرض الأحلام يقول...

أحيييك جدا على هذا الكلام الجميل

فأنت قلت الحق

لان العيب مش على الحكومة وحدها ولكن العيب على المواطن المصرى الذى اصبح فاسد

وكان ممكن نعذره ان كان هناك ازمة فى المعلومات ولكن اصبحت الآن المعلومات متاحة للجميع

نحن فى حاجة حقيقية الى صدمة كبيرة تفوقنا جميعا صدمة تجعل الشعب يرجع لوعيه

تحياتى لك
وبعتلك تاج

فبركة يقول...

memo
-----------------------------------
سامحنى يا مان بس والله كنت مشغول أوى لأننا قربنا نصور حلقات رمضان الجاى فى برنامج الناس وأنا إن شاء الله

فبركة يقول...

shams
-----------------------------------
إمتحانات الثانوية العامة ساعات بتجيب برضه اسئلة صعبة
بس اللى مذاكر كويس وفاهم مش حافظ وعنده ضمير طول السنة بينجح

أمتى بقى نذاكر ويبقى عندنا ضمير عشان نعرف نحل؟؟

فبركة يقول...

تائهة فى أرض الأحلام
-----------------------------------

فرحان قوى بكلامك الجميل ده وياريت يوصل معناه لعشر الشعب المصرى
ماكانش ده بقى حالنا

جاتنا نيلة فى حظنا الهباب
نياهاهاهاها