همس .. التعبانين

همس .. التعبانين

الأحد، ٢٨ أكتوبر ٢٠٠٧

هكذا سنحل كل مشاكلنا بحق وحقيقى 1




مش عارف ليه أنا حاسس إن فيه حالة يأس وإحباط مسيطرة علينا..يمكن فى قلة
قليلة لسه متفائلة،لكن بصراحة مع معظم التعليقات اللى بسمعها من العديد من المواطنين فى مختلف وسائل المواصلات العامة،والهيئات الحكومية،وحتى الطلبة بتوع الحضانة حسيت إن الناس ياعينى دماغها لسعت،وجابت آخرها من الحكومة،والبلد واللى فيها..
ده حتى من يومين كنت معدى جنب سفارة الإمارات لاقيت طابور طوييييييييييييييييييييييييييل ولا كأن السفارة بتوزع لحمة مجاناً،وسألت واحد واقف عشان أستفسر على الحكاية فقال إنه جاى يعتمد شهادته من السفارة عشان يعرف يشتغل فى دبى،والغريبة إن رسم إعتماد الشهادة ب 168 جنيه ونص للعادى و200 جنيه للمستعجل..يا خراب مستعجل يا ولاد
يعنى المصريين على كده أجدع ناس يتعمل عليهم شغل برة وجوة..ده على كده حكومتنا الرشيدة اللى بتاخد 15 جنيه من طلبة الجامعة رسوم الكارنيه المعفن طلعت أجدع من أخوانا العرب اللى إحنا رايحين نترمى فى أحضانهم،ونتمرغ فى خيرهم..
المهم بصراحة ما أخبيش عليكو أنا سألت نفسى سؤال مهم جدا – من وجة نظرى يعنى – وهو إذا كانت البلد باظت،وعايزين نطفش منها بأى تمن،والحكومة حرامية،والفساد مالى كل حتة..طيب إحنا بقى كمواطنين فين دورنا لحل أزمتنا..هى الحكومة دى يعنى يا أخوانا نزلت علينا من السما مثلا على غفلة..صحينا مثلا من النوم لاقيناها كابسة على نفسنا من غير أحم ولا دستور؟؟
إحنا اللى سيبناهم ياخدوا مراكز مرموقة ويشغلوا وظائف حساسة ويقبضوا على قلبهم قد كده ويخربوا على قد ما يخربوا من غير حتى ما نحاول نتحرك أو نعترض و رضينا بسكاتنا وسلبيتنا..كل ما أتفرج بصراحة على مسلسل الملك فاروق،وأشوف أزاى كان عصر الملك اللى الثورة أقنعتنا إنه فاسد،وبتاع حريم،كان فيه نظام برلمانى حقيقى،وأفكار ليبرالية،وصحافة قوية،والأهم من ده كله شعب فاهم،ومثقف،سواء الأفنديات اللى لابسين طرابيش،أو الفلاحين اللى قاعدين ع المصطبة،أو عمال المصانع..الكل كان بيقرأ،ويتابع،ويعبر عن رأيه..كان فى مفكرين،وندوات ثقافية،ومظاهرات،وحركات،وتجمعات..ماكانش فيه حاجة اسمها منع التجمع،أو منع التظاهر..حتى القهاوى يا بشر ماكانش الناس اللى قاعدين عليها بيلعبوا استميشن،وطاولة..كان الكلام فيها عن السياسة،والتأثيرات السياسية،والاقتصادية،والاجتماعية،لأى قرار تاخده الحكومة..ساعتها بتحسر على عصرنا الحالى الذي يزعم البهوات اللى فوق أنه عصر الحريات والتعددية الحزبية وأزهى عصور الديموقراطية
عشان كده أنا فكرت..وسألت نفسى..أزاى نخرج من هذا الوضع المليء بالكساد،والركود،والسلبية،واللامبالاة،والإحساس باليأس،والضياع اللى إحنا حاسين بيهم..
وأثناء تفكيرى دار حوار بينى وبين زميلة مدونة اسمها مروة جمعة..وكان الحوار أون لاين على الماسنجر..
يا ريت تقروه،وتشوفوا حل المشكلة جه إزاى من وجهة نظرى المتواضعة،ويهمنى أعرف رأيكم فى مدى تطبيقه،وإمكانية تفاعل وتجاوب الناس معاه..
أنا دموع الملائكة،ومروة كتاكيتو


دموع الملائكة says:
بطلتى تكتبى فى مدونتك يعنى
كتاكيتو .. says:
يعنى..كسل مدوناتي عام
دموع الملائكة says:
كلنا هذا الرجل
كتاكيتو .. says:
مش عارفه.. نفسي حاجة تفرحني
دموع الملائكة says:
يبقى مش هتكتبى ولا تقرى
دموع الملائكة says:
ده حتى ميكى ماوس لا يخلو من المكائد والظلم
كتاكيتو .. says:
عندك حق
كتاكيتو .. says:
حتى ميكي
دموع الملائكة says:
ربنا يفرجها
كتاكيتو .. says:
آمين ..
دموع الملائكة says:
قوليلى يا مروة
كتاكيتو .. says:
نعم
دموع الملائكة says:
لو حبينا ننشر الوعى والفكر المستنير تفتكرى ايه هى المشكلة الاولى اللى هتواجهنا
كتاكيتو .. says:
اليأس ...ثقافة "مافيش فايدة" اللى ماشيين عليها
كتاكيتو .. says:
هعمل ايه بالفكر ..لو الفكر هيأكلني عيش ،ماشي ألف بركة ..
كتاكيتو .. says:
عارف ..الفقر مشكلة كمان
دموع الملائكة says:
اممممممممممم
كتاكيتو .. says:
عدم وجود قدوة ..ده مشكلة
دموع الملائكة says:
تعرفى؟ انا شايف المشكلة الأولى أكبر وأهم من كده
كتاكيتو .. says:
اللى هي أيه؟
دموع الملائكة says:
انا السؤال اللى سألته كان بيقول ايه؟
كتاكيتو .. says:
لو حبينا ننشر الوعى والفكر المستنير تفتكرى ايه هى المشكلة الاولى اللى هتواجهنا؟
دموع الملائكة says:
تمام
دموع الملائكة says:
لو حبينا ننشر الوعى والفكر المستنير
دموع الملائكة says:
يبقى المشكلة اللى هتواجهنا أزاى نحكم إن ده وعى وفكر مستنير؟
دموع الملائكة says:
مين اللى هيحدد الوعى والفكر المستنير
كتاكيتو .. says:
فكرك
كتاكيتو .. says:
ثقافة مجتمعك الأصيلة
كتاكيتو .. says:
دينك ..قوميتك
دموع الملائكة says:
ما أنا إذا كان فكرى ضد فكرك يبقى انتى هتشوفينى جاهل وضال وهتحكمى عليا بالجهل والغباء وهتبعدى عنى..لأننا للأسف نفتقر للغة الحوار المتحضر فى الوقت الحالىكتاكيتو .. says:
وليه مايكونش رأيي صواب يحتمل الخطأ
دموع الملائكة says:
لأن اللى حواليكى مش نفس اللى كانوا حوالين الإمام الشافعى
دموع الملائكة says:
الناس اتغيرت
كتاكيتو .. says:
تمام
كتاكيتو .. says:
مش الناس بس
كتاكيتو .. says:
أنا بدرس تربية مقارنة
كتاكيتو .. says:
النظام التعليمي هو الأساس
دموع الملائكة says:
وإذا كان الإمام الشافعى نفسه اتعمل فيه كده اومال احنا بقى هيتعمل فينا ايه من الناس اللى أفكارنا هتخالف أفكارهم
كتاكيتو .. says:
وانت شايف يا شريف نظامنا عامل ازاي
دموع الملائكة says:
عارفة بقى ما بين وجهة نظرى فى نشر الوعى،والفكر المستنير وإقتناعى إن المشكلة تكمن فى تحديد الفكر المستنير وبين وجهة نظرك ان المشكلة هى اليأس والفقر فى بين وجهتى النظر حاجة مشتركة لازم نلعب عليها
دموع الملائكة says:
عشان ننجح فى نشر اى فكر
دموع الملائكة says:
وللأسف الحاجة دى معروفة بس الأشرار بيستخدموها استخدام خاطيء


كتاكيتو .. says:
وايه هي الحاجة المشتركة
كتاكيتو .. says:
اللي الاشرار
كتاكيتو .. says:
بيستخدموها من وجهة نظرك
دموع الملائكة says:
اللعب على وتر المنفعة والمصلحةدموع الملائكة says:
اللى هيصوتوا فقرا يبقى اشتروهم بالفلوسكتاكيتو .. says:
أيوه
كتاكيتو .. says:
تمام
دموع الملائكة says:
محتاجين شغل يبقى شغلوهم
دموع الملائكة says:
عندهم مرض يبقى عالجوهم


دموع الملائكة says:
بس المشكلة مش بتتحل لأن اللعب على الوتر بيكون بالكلام وبس
دموع الملائكة says:
مجرد وعود
دموع الملائكة says:
لكن لو الفكر ده قدر يفيد اللى حواليه بجد يبقى بدأ البداية الاولى الصحيحة
كتاكيتو .. says:
مجرد وعود ..عارف المسلمين الاوائل كانوا متقدمين ليه ..لأن كلمتهم كانت كلمة راجل
كتاكيتو .. says:
الكلمة سيف
دموع الملائكة says:
المرحلة التانية بقى ودى الاهم..بعد ما هتنفذ وهتحل الازمة بجد هل ده هيبقى مجرد مرحلة وهتنتهى وخلاص ولا هتستمر فى المنفعة
كتاكيتو .. says:
امممم
دموع الملائكة says:
لو الفكر بتاعك قدر انه يفيد الناس وخلاهم يفيدوا نفسهم ويكتفوا بحل مشاكلهم ومايحتاجوش لحد يبقى فكرك فعلا فكر مستنير
دموع الملائكة says:
اما لو فكرك نفعهم مؤقتا وبعدين رجعت ريما لعادتها القديمة
دموع الملائكة says:
يبقى كل كلامك غلط او يحتوى على قدر كبير من الخطأ
دموع الملائكة says:
يبقى عشان نطلع نقول كلام مفيد لازم يقترن بتنفيذ مفيددموع الملائكة says:
وعشان يقترن بتنفيذ مفيد لازم امكانيات


دموع الملائكة says:
طب افرض مفيش امكانيات؟؟


كتاكيتو .. says:
يبقى انسف
دموع الملائكة says:
النسف،وإعادة البناء من أول وجديد ده مبدأ فولتير فى الثورة الفرنسيةدموع الملائكة says:
وغير قابل للتطبيق فى الوضع الراهن
دموع الملائكة says:
الصح بقى أنك تنور العقول وتفيد العقول والابدان
كتاكيتو .. says:
طبعا غير قابل
كتاكيتو .. says:
ماديا ومعنويا
دموع الملائكة says:
لأ قابل،بس عشان تفيد لازم يكون عندك امكانيات
دموع الملائكة says:
بس خد بالك
دموع الملائكة says:
انت عايز تعلم الناس ازاى يعتمدوا على نفسهم ويستغنوا عن خدمات اللى حواليهم
دموع الملائكة says:
يبقى احسن حاجة انك تبدأ بنفسك..يعنى تستغنى انت اولا عن خدمات وامكانيات غيرك
دموع الملائكة says:
وتخلق بنفسك امكانيات تساعدك وتساعد غيرك
دموع الملائكة says:
ساعتها فعلا يبقى عندك تجربة حية قابلة للتطبيق
دموع الملائكة says:
وتقدر بيها تفيد الناس وتعلمهم كلام عملى اكتر منه نظرى
دموع الملائكة says:
السؤال بقى..ده هيتحقق ازاى؟؟
دموع الملائكة says:
أنا شايف إنه ممكن يتحقق بالاتحاد بين الافكار والمؤهلات
دموع الملائكة says:
مجموعة شباب خريجين مثلا كلية طب..يعملوا قوافل طبية وينزلوا يعالجوا المرضى مجانا
دموع الملائكة says:
وخريجى الصيدلة ياخدوا من شركات الادوية ادوية عينات مجانية
دموع الملائكة says:
وخريجى الإعلام من الصحفيين وموظفى العلاقات العامة يغطوا الانشطة اعلاميا ويروجوا افكارهم
دموع الملائكة says:
والمهندسين يساهموا بقدر تخصصاتهم فى حل ازمات الغلابة
دموع الملائكة says:
وخريجى كليات الأداب والتربية يدوا مجموعات تقوية مجانا ولو مفيش مكان للطلبة،يبقى ممكن يدوا الدروس دى فى المساجد والجوامع والكنائس
دموع الملائكة says:
وهكذاكتاكيتو .. says:
جميل جدا ..
دموع الملائكة says:
كل واحد يتبرع بتخصصه
كتاكيتو .. says:
كل فئة في المجتمع تساهم حتى عمال النظافة
دموع الملائكة says:
بالظبط
دموع الملائكة says:
ومفيش مانع من المساهمة فى تخصص تانى غير تخصصنا
كتاكيتو .. says:
ياريت ..ياريت ..
دموع الملائكة says:
يعنى مثلا لو مهندس ميكانيكا ما لاقاش امكانية للمساهمة بتخصصه،ممكن يشرف على النظافة ،المهم محدش يقعد ساكت
دموع الملائكة says:
المهم ان كلنا نتحد بتخصصاتنا ومؤهلاتنا..واهو فرصة نبقى لحقنا القطر مادام البلد بتتحرك
كتاكيتو .. says:
هههههههههههههههههه
كتاكيتو .. says:
توووووووووووووووووووووووت
دموع الملائكة says:
يالا الحقى نطى


دموع الملائكة says:
بس المشكلة دلوقت مين هو اللى هينفذ
كتاكيتو .. says:
مين ..
كتاكيتو .. says:
الشباب
كتاكيتو .. says:
احنا يعني
دموع الملائكة says:
ازاى بقى نلمهم ونقنعهم بالتنفيذ
كتاكيتو .. says:
نفسي اعرف
كتاكيتو .. says:
لما يبقى العمل الجماعي قيمة
كتاكيتو .. says:
هنقدر نلمهم
دموع الملائكة says:
انتى عارفة بقى عشان نعرف نلمهم محتاجين لأيه بجد؟؟؟
كتاكيتو .. says:
لأيه
دموع الملائكة says:
لرجال الدين
كتاكيتو .. says:
مالهمش مصالح
دموع الملائكة says:
لو الفكرة دى اتقالت فى اكتر من خطبة جمعة والشيخ طلب من المصلين تدوين اسمائهم وبياناتهم فى الجامع..كل واحد يدون تخصص ومدى استعداده للمشاركة بتخصصه،وطاقته،وفى نفس الوقت كل واحد يدون أزمته ومشكلته،ونبدأ بعد كده نحصر المشكلات،والطاقات،والتخصصات ونوفقهم مع بعض بحيث إن كلنا نحل أزمتنا ونفس الحال فى الكنيسة..تخيلي لو كل سكان كل حى أو مركز،أو نجع عملوا كده..كلنا ممكن نحل أزمتنا ونثبت للحكومة أننا لينا دور،ومش سايبين كل حاجة عليهم وخلاص
دموع الملائكة says:
يبقى مع الوقت كلنا هنقرب من بعض،وهنتعلم،ونستفاد،ونبدأبقى نراقب العمل الحكومى،ونتابع تنفيذ تصريحات الحكومات،ونبقى صحينا من غفلتنا
كتاكيتو .. says:
عارف ..
كتاكيتو .. says:
هيتقبض عليهم
كتاكيتو .. says:
ويقولوا عليهم محرضين
كتاكيتو .. says:
ومخربين
كتاكيتو .. says:
أصلي عايشت رجال دين زي الورد ،وفشلوا للأسف
دموع الملائكة says:
يبقى إذن لازم نمشى فى اتجاهين .. اقناع رجال الدين واقناع رجال الامن
كتاكيتو .. says:
اقناع رجال الأمن ؟
دموع الملائكة says:
اه
كتاكيتو .. says:
ولو قلت لك ان المنظومة كلها محتاجة اعادة بناء
دموع الملائكة says:
مش ممكن نبدأ من الأول خالص فى الهدم والبناء..أعتقد إننا لازم نصلح خطوة خطوة..عموما تخيلى مثلا انا روحت مبنى مديرية امن القاهرة وروحت لرئيس الحى بتاعنا
دموع الملائكة says:
وروحت للمسئولين وطلبت منهم متابعتنا وإعطائنا الفرصة لحل مشكلاتنا بأنفسنا
دموع الملائكة says:
ده اللى أنا بفكر فيه دلوقت
دموع الملائكة says:
اختبار ارض الواقع
كتاكيتو .. says:
و تفكير راق .. لازم تلاقي ارض واقع ,,وناس كماندموع الملائكة says:
ليه مانحاولش اننا فعلا نروح لقادة الرأى وصناع القرار ونقول لهم لو محدش قادر يساعدنا ادونا فرصة اننا نحاول نحل مشاكلنا بنفسنا
دموع الملائكة says:
وتحت راعايتكم واشرافكم
كتاكيتو .. says:
يا ريت يكونوا كده
دموع الملائكة says:
بدل ما حد يتهمنا بعمل تنظيمات سرية والتستر على اهداف خفية
كتاكيتو .. says:
دول فكرهم في حاجات تانيه
كتاكيتو .. says:
انت طيب ..طيب جدا
كتاكيتو .. says:
تفتكر هم ليه مش بيحاولوا يصلحوا الحال
كتاكيتو .. says:
مش بحبطك
كتاكيتو .. says:
ياريت ياريت تحاول
كتاكيتو .. says:
بقولك حاول ومش هتخسر
كتاكيتو .. says:
هتضاف لتجاربك
كتاكيتو .. says:
روح لصناع الرأي والقرار
كتاكيتو .. says:
وشوف رأيهم
دموع الملائكة says:
فى نظرية بتقول انهم بيحاولوا يشغلوا الناس بالفقر والمرض والبطالة عشان محدش يتلهى بالسياسة ويتدخل فى الحكم ونظرية تانية بتقول انهم جهلة ومش حاسين باللى الناس فيه لأنهم بيمارسوا مهامهم الوظيفية فى مكاتب مكيفة وحراسات خاصة ومواكب فاخرة بفلوسنا
دموع الملائكة says:
انا بقى عايز اشوف بنفسى..هل واحدة منهم صح ولا ى نظرية تالتة لسه محدش يعرفها
دموع الملائكة says:
مش هنخسر حاجة يا جماعة من التجربةكتاكيتو .. says:
انت صح
كتاكيتو .. says:
عايز تتأكد
كتاكيتو .. says:
بدلا من نظرية "الناس بيقولوا"
دموع الملائكة says:
بالظبط
كتاكيتو .. says:
ربنا يوفقك


يا ترى بقى بعد هذا الحوار أنتوا أيه رأيكم؟
منتظر تعليقاتكم
shiko_4u@hotmail.com

هناك ٣٧ تعليقًا:

رحــــيـل يقول...

اولاه خالص تحياتى ليك ولمروه
ثانيا انا معاك فعلا ان فى حالة يأس منتشره فى الهوا اللى بنتنفسه وكل واحد مش عاجبه حاله وعنده ميت هم ومشكله
اما بقى بالنسبه للفكره فطبعا جميله جدا جدا وياريت نقدر بجد نفذها بس الموضوع مش هيكون سهل ابدا
هنقابل فعلا عقوبات كتير جهل .فقر.افتقاد لمعنى العمل الجماعى .وعدم الالمام بمدأئه
ده غير طبعا الامكانيات الغير متوفره يعنى القوافل الطبيه مثلا هتتصرف ازاى فى تكلفه حملاتها
وزيهم المهندسين والصيادله
يعنى ده هيكون مثلا عمل خيرى ولا فعلا شغل ليهم لحل ازمه البطاله
اصل عشان يكون فى شغل وتقدر فعلا تقنع شاب لسه متخرج لازم يكون فى مقابل مادى
عشان احنا كده هنواجه نفسيات كتير ممكن شاب يقتنع بالمبدأ نفسه وشاب تانى يكون الاولويه للفلوس
وهكذا
فلازم الموضوع يكوم مدروس كويس جدا ومتخططله
مش نقول عايزين نعمل والحماس ياخدنا ونقف عند اول مشكله
ده غير فى نقطه تانيه تفتكر الحكومه هتسيب فكره زى دى تطلع للنور
ده شئ ايجابى جدا وهيفوق الناس والشباب
حتى لو انت شايف انه ملوش دعوه بالسياسه هما مش شايفين ده
انا مش بقول احباطات والله انا بس بفكر معاكو بصوت عالى انا الفكره نفسها عاجبانى جدا جداواكيد لو اتنفذت ان شاء الله اكون فيها
حاجه كمان
بالنسبه لرجال الدين
فانت فكرتنى برنامج عمرو خال صناع الحياه
اللى كان من خلاله بينادى بفكره التنمية بالايمان
كان بيقول ان كل واحد بيساهم بجزء صغير من وقته على قد مايقدر او من مجاله لو مش فاضى مثلا بالوقت او الفلوس
بصراحه كانت فكره هايله انك تحس ان الكل ليه دور
احنا بقالنا اربع سنين تقريبا بنحاول
وطبعا السكه مش كانت مممهده بالمره وكان فى عقبات كتير
كان اهمها ان البنات كانوا خايفين
وان محدش مقتنع بفكره التنميه على اساس ان مفيش فايده وان احنا اللى مش هنصلح
اسفه طولت جدا انا عارفه
بس اصل الموضوع يستاهل المناقشه بجد

rainbow يقول...

صباح شريف حظرتكم
انت ومروة عاملين حديث غاية فى الجمال .. وغايته اساسا اجمل ..محاولة للخروج من الازمة ، من النفق اللى اتولدنا لاقيناه بيطول ..البطالة البطالى البطالة ثم النتائج الفقر الجهل المرض وبالتالى عايشين ومش عايشين كله بيقول يا عم امشى جنب الحيط .. قول يا باسط

وجود افكار ايجابية بالشكل ده ممكن يقابلها برضه ردود فعل ايجابية وتلاقى شباب كتير عايزين يساهمو .. مش هقولك كمية العقبات هتكون اد ايه بس عايزة اوضحلك ان المشروع ده يعتبر خيرى بالدرجة الاولى لانه غير هادف لاى ارباح شخصية الا العائد المعنوى وانتشار روح الجماعة .. وده مش هدفك انت ومروة واحنا معاكو انت عايز تحل المشكلة بحالها بكل جوانبها وده مستحيل لازم تتعامل مع كل جزئية لوحديها زى البازل عشان تكون الصورة النهائية

ما حدش هيسيبك تكون قائد فريق عمل وهتتهم بالحض على التجمهر وتكدير الامن العام ! افكارك جميلة وقابلة للتنفيذ بس فى نطاق الاعمال الخيرية وليس الخروج بالشباب من نفق الازمات والصفعات المتوالية

واعتقد ان فكرة الاعمال الخيرية كبداية مش وحشة .. ويمكن يحصل تطور من غير تهور والمواضيع توسع ويكون فى خير .. لكن تفتكر واحد زى عمرو خالد عمره برضه ما فكر زيك يكون زعيم ولا حاجة ايه اللى خلاهم يخرجوه بره مصر ؟

الاجابة واضحة ..اى صوت يعلى على صوت المارش العسكرى اللى عايشينه بيعمل قلق وهو صحيح واحد مجرد واحد لكن كدرهم فتخيل معايا لو الواحد ده بأه عشرة عشرين الف .. ممكن المعجزة تتحقق ؟ جايز

خالص تحياتى
هدى

تامر حسين يقول...

الصراحه من طول الموضوع مقريتهوش
بس مقدرتش امشي من غير ما اعلق
بس اكيد البوست جميل حتي لو مكنتش قريته وتحياتي جدا

كاميليا بهاء الدين يقول...

كلام جميل ولكن:
من يستطيع ان يترك عمله ويتفرغ لعمل خيرى وهو بالتأكيد فى حاجة ماسة الى مورد دخل ليعيش هذا ان لم يكن لديه اسرة مسئول عنها
ثانيا هل هذه الموجوعات كل فى محافظته ام انها مجموعات ستجوب المحافظات

اقولك على حاجة؟
الإمكانيات تستطيع ان تحصل عليها من الشركات الكبيرة والمجموعات الاقتصادية يمكنها ان تدعم مثل هذه المجموعات كما تدعم فرق كرة القدم والاسكواش والمهرجانات اي انها تكون الراعى الرسمى لمجموعات النهوض بمصر هذه, وكل فى مجاله, اعنى احمد عز وشركاته تدعم مجموعات المهندسين المشاركين بمجهوداتهم فى مجال الاسكان, نجيب ساويرس فى عدة مجالات لتشعب اعماله, محمد ابو العنين ونصير وغيرهم من رجال الاعمال فى مصر, ولامانع من عمل دعاية لهم عن طريق المجموعات المتطوعة لخدمة مصر بكتابة اسماء شركاتهم فى المناطق التى تدخلها المجموعة للمساعدة

ولا مانع من دعوة بعض الهيئات التى تتلقى منح من دول اوروبية مثل اتحاد تحديث الصناعة والبرنامج الإنمائى وصندوق التنمية الثقافية والعديد من الهيئات الاخرى

بوست لطيف وحوار جميل
تمنياتى بالتوفيق

كاميليا

غير معرف يقول...

سلام عليكم يا باشا

الفكره اننا نخرج من اليأس و نحس ان الجبنه لسه بيضا بس احنا اللي حاطنها ف التلاجه و لازم نطلعها من التلاجه عشان نتاكد انها بيضا
كويس
يعني احنا اللي لازم نتحرك عشان نثبت ان الجبنه بيضا

عن طريق العمل التطوعي

و ده فعلا موجود
و لمسته من خلال تطوعي ف دار رسالة للايتام لكذه سنه
كنا بنحاول اننا نقوم بالدور ده
الحكومه مش عاوزانا
نكلم ف السياسه خلاص احنا هنتكلم ف التنميه
كنا و لسه بنعمل قوافل طبيه لقرى و عشوائيات و مناطق فقيره بنقدم فيها الاستشاره الطبيه و الادويه عن طريق مجموعه من الاطباء و الصيادله بيتطوعو بمجهودهم ف اليوم ده
مش بس كده القافله بتكون فيها توزيع لشنط غذائيه و فرح جماعي و بطاطين لو ف الشتا

ده غير طبعا انشطه تانيا كتير موجوده قايمه ع العمل التطوعي
اذاي تتبرع بوقتك
زي دروس التقويه
معارض الملابس المستعمله
حملات التبرع بالدم
الخخخخخخخخخخخخخخخخخخخخ
او اعادة ترميم مدارس
زي مدرسه كعابيش

بس

بس المشكله اللي حستها انك بتنفخ ف قربه مقطوعه

انا متفق معاك ان موضوع الهدم و البناء من اول و جديد بدأ خطأ

يعني انا ف الامتحان لما باكتب حاجه و بعدين اعرف انها غلط مبرضاش امسحها و اكتب ف صفحه جديده
بس ما علينا

المشكله
اني مش حاسس ان هوه ده الحل

مع اهميتة
عشان يكبر فينا الاحساس بالمسئوليه

مش عارف

بس اكيد فيه حل اسرع

بص انا هافكر و ارجع تاني

بص اخلص قفا الزبون اللي ف ايدي

Unknown يقول...

انا فعلا أتمني ان الفكره دي تنجح

رغم انها هتكون صعبه شويه

بس مفيش حاجه سهله بتبقي حلوه

ولازم بكون في اعتبرنا اننا بنحاول نغير فكر ناس

زدي من اصعب الحاجات اللي ممكن نغيرها

لكن المهم انها مش مستحيله

مدونة كل العرب يقول...

صديقى الرائع شكرا للبوست الممتاز دا وشكرا لتقديم فكرة جديدة فى ابداء الراى
اقتباس
مجموعة شباب خريجين مثلا كلية طب....وخريجى الصيدلة.....وخريجى الإعلام من الصحفيين وموظفى العلاقات العامة......والمهندسين ....خريجى كليات الأداب والتربية
- صديقى من الصعب جدا لملمة هؤلاء الشباب حديثى التخرج للعمل الميدانى الاجتماعى الغير مجدى بالنسبة لمستقبلهم لان هؤء محتاجون اصلا للمساعدة حتى لو كان فى الطب او الهندسة او غيرة فمن الصعب- براى- ان يقبل اى واحد من الذى ذكرتهم ليقوم مقام الحكومة التى هى مسؤلة بالاساس عن قوة اقتصاد البلد وعن تشغيل العاطلين ونشر الخير والمنفعة على الجميع نحن لا نريد ان ننصل هؤلاء من مسؤلياتهم لان فى ذلك تقليل فى حقك -- الجميع يحب ان تكون دولتة او حكومتة حكومة قوية لا تتدخر جهدا لمنفعة الناس لان هؤلاء الناس هم منهم وهم من الناس فتصير بذلك المنفعة للجميع
نتمنى ان يعمل معظم الشباب بمثل طاقتك وبمثل همتك وجهدك الرائع وصدقك فى ابداء الراى والنصيحة وليعمل الجميع فى مصلحتة الشخصية >>ولا ينسى ان يكون هناك جانب خيرى ينفع الناس ايضا لاننا فى مجتمع مدنى كل طاقاتنا مبنيسة على طاقات غيرنا لاننا نكمل بعض .
واذكرك بان مصاريق بعض الجامعات وصلت لاكثر من ثلاثون جنية - اسال الازهرية-
تحياتى لك ولراى المحترم وشكرا لمجهودك الوفير
واعتز منك على ان اول مداخلة لى تكون نقدا
حقيقة اعتزر
وشكرا لتشريفكم لى فى مدونتى
تــــــحيــــــاتــى

غير معرف يقول...

رغم أنى فى أجازة واسترخاء حاليا لكن كان لازم اقول رأيي فى فكرة زى دى

ياترى الناس عندها قابلية انها تتغير بالتدريج ولو حتى التدريج البطىء جدااا؟؟؟

ولا راضية وقانعة باللى هى فيه وكله ماشى؟؟

يا ريت تتنفذ فعلا
رغم قناعتى ان محدش حيسيبك تبدأ بناء بنية تحتية أخلاقية جديدة
هم مستفيدين من حالة الفتور والعفن العقلى اللى المصريين فيها

ونصيحة من اختك الكبيرة

ابعد عن امام المسجد دول بتيجى لهم الخطب جاهزة من الأوقاف والداخلية

(وش بيغمز)

تحياتى

Unknown يقول...

حمد الله ع السلامة ماعرفتش رجوعك الا صدفة النت عندى كان قاطع طول رمضان واضح أن فاتتنى بوستات جامدة

ع العموم ياسجل الحضور و راجعة تانى البوست ده بالذات طويل أوى و محتاج لقاعدة

تحياتى

YOTTA يقول...

حاسة ان المشكلة أكبر من كده بكتير
أكبر من طلبة يتجمعوا يعالجوا الناس بالمجان
أو يدوا دروس ببلاش
أو..أو
طب ماهو فيه مؤسسات كتير مش تابعة للحكومة وبتعمل كده فعلا
لكن فين التغيير اللى احنا حاسينة ولامسينة
؟؟
مافيش
..
شوف أنا كمان بقعد اتكلم كتير فى لحظات تجلى وصفا وتفاؤل مع اصحابى عن الموضوع ده
ولازم نعمل حاجة عشان نصلح الحال
لكن بارجع واقول
يا بت مافيش وقت
خليكى ف نفسك
وفكرى ف مستقبلك وابنيه يادوبك تلحقى
يمكن يكون نوع من الانانية
لكن انا شايفاه واقعيه
والظروف اللى حوالينا هى اللى بتخلينا كده
مش سلبيين لكن ايجابييين تجاه نفسنا بس
محدش فاضى للتانى
ومحدش فاضى للبلد دى
..
عموما بأه أنا مؤمنة ايمان مطلق
ان مشكلة البلد دى مشكلة عقول
عقول الناس والحكومة
كلها خربانة
واللى يصلح العقول التعليم والقراءة
بسسسسسسسس
..
بس ف العموم عجبتنى أفكارك
...

son's egypt يقول...

السلامعليكم
انا اولا مع النظرية اللي بتقول ان الحكومة بشتغل الناس بالشغل والبالة والفقر علشان متفكرش في اي حاجة تانية
وبعدين مشكلة الخروج من الكساد اللي البلد عايشة فيه محتاج لزمن طويل لانه عبارة عن رواسب سنين كتيرة ومش من السهل الخروج منها في يوم وليليه
بس ليه منحاوليش اني احنا نتخلص من الكساد ده
يعني مثلا الثورة الباشفية قامت لما الناس حست بالظلم وكتر الظلم فقامت علي الرغم من الدماء الكتيرة اللي سالت
انا هنا مش بقول اني احنا نقوم بثورة علشان محدش يفتكر حاجة لا سمح الله
بس نقوم بثورة من جوانا احنا علي نفسنا
وده اول طريق ممكن ناخدة عشلان نطلع من الكساد

Masry يقول...

شريف عارف انت مش بتتكلم عن موضوع مهم .. انت بتتكلم عن اهم موضوع و اصعب موضوع النهاردة .. مستقبل مصر
بص يا باشا في البداية اهنيك علي اسلوب الطرح و المناقشة .. ثانيا انا هقول رايي هنا مع ملاحظة ان لاهمية الموضوع المساحة هنا اصغر من انها تكون ساحة حوار او مناقشة في موضوع زي دة .
الحكاية بقي فيين في الحكومة ولا في الناس ولا في الاخلاق و السلوك اللي همة مش الناس لان ممكن يكون الشخص كويس بس محدش علمة السلوك الصح و بيكون بس محتاج اللي يعلمة.
1- اولا لازم يكون اي شخص يعتمد عليه في عملية اصلاح يكون فيه شوية مواصفات
فمن رايي مينفعش اروح اجيب شباب الجامعة و اقنعهم بعمل تتطوعي لان حتي لو وافقوا هنقابل مشاكل بعد كدة زي :
عارف لو جبت شاب مصري مطحون النهاردة ميعرفش الالف من كوز الدرة و قررت تظبطلة حياتة شوية علي سبيل المثال لا الحصر بأستخدام علوم التنمية البشرية او حتي كان من جماعة منظمة زي الاخوان . هيحس بانة علي و خد بالك من التغير في اسلوب التعامل و السلوك لانه هيبقي احسن اه , بس هيبقي اشبة بسلوج نجم سينمائي مش سلوك مواطن المفروض انه كدة بقي طبيعي و المشلكة دي ليها حلين يا نغير طبقات علي بعضها يا يبقي الشخص المعتمد عليه او اللي هيتغير دة فاهم كويس اوي ان دي مجرد خطوة في مشوار اكتر من مليون خطوة علشان بلد و انه كدة بقي طبيعي مش بقي متميز .
2- هنغير ميين بقي و ازاي .. شعب كامل النهاردة و خد بالك بقي ان احنا عندنا مشكلة ان انت مش بتتعامل مع وضع ثابت .. لا دة منحدر السلوك بينزل كل يوم عن اللي قبله .. يعني الموضوع عايز دراسة كويسة زي ما كل الناس بتقول
بس ندرس ايه يعني علشان اغير سلوك شعب .. انا من رأيي ان المشكلة في الادراك في تقييم الاشياء في التوازن عن الناس في الثقافة المشوهة بمعني اشمل
المواطن المصري لازم يفهم انه انسان زي اي انسان مش فهلوي ولا حاجة و انة مدهنش الهوا دوكو .. مش كدة و بس لازم المواطن المصري و خد بالك من الجملة دي قوي ((( لازم يتعلم يكون نفسة ))) مش حد تاني .. قرارة بتاعة مش يلف يسال كل اللي يعرفهم كل مرة يحتاج ياخد فيها خطوة و في الاخر يشوف حد عمل الحاجة دي قبلة علشان يعملة زية لان دة تشوة في السلوك لان مفيش حد زي التاني , لازم يتعلم ان كلماتة تكون بتاعتة نابعة با من عقلة با قلبة يعني اسلوب حفظ الحالات اللي خلي مصر كلها ممثلين او بيتكلموا كلام مش موزون علشان كان مسجل و طلع في وقت غلط و من غير ميمر علي الدماغ دة برضة تشوة , لازم يعرفوا ان النهاردة غير امبارح و امبارح غير اول امبارح يعني مينفعش استخدم لا ثقافة ابويا ولا سلوكة ولا علمة علشان اعيش بيهم النهاردة من غير ما اعدلهم و التعديل دة عمل محتاج فهم و تقيم و اعادة تاطير علشان تناسبني و تناسب اليوم و هوة دة استخدام ثقافة الماضي انما نقل الثقافة في العلب اللي مكتوب عليها عادات و تقاليد و اصل اهلنا كانوا بيعملوا كدة دة تشوية ...
3- الدين و رجال الدين دة موضوع ضخم جدا مينفعش يطرح في كلمات قليلة مش يتناقش كمان و بالتالي مكانة مش هنا
انا عمال اتكلم عن الشعب و مجبتش سيرة الحكومة يعني ولا تطرقت للجانب دة لكن دة ميمنعش انها مسئولة عن جزء من اللي بيحصل بس تعالي بص معايا علي مثال بيحصل في الشارع
لو انت من سكان القاهرة و بتركب عربيتك او بتركب مواصلات يبقي بتعدي علي يو ترنز كل يوم .. في دول العالم كلها لو انا هدخل يمين بجهز نفسي و بروح الحارة اللي في اقصي اليمين و لو هدخل شمال برضة بروح الحارة اللي في اقصي الشمال , نبص بقي في مصر هنلاقي اللي داخل يمين جاي من اقصي الشمال و اللي داخل شمال جاي من اقصي اليمين و لو حبينا ننظمها قانونا مش هنقدر لان عدد المخالفين قوة شعبية و تقدر تشوف بعينك في
1- قدام دار المدفعية - الماظة
2- تقاطع الاتوستراد مع امتداد رمسيس
3- شارع الهرم
و غيرهم كتير
بيتهيالي الموضوع محتاج مناقشات و دراسات بس اكيد في امل
تحياتي

مدحت محمد يقول...

انت ومروة رغايين اوى
عشان الموضوع حلو
اضطريت اقراه كله
والاكل برد هاكل الاكل بارد بسببكم
من الاول حالة الياس
طبعا
البطالة اللى احنا فيها
والفقر
والمرض
والخوف من الاكل اللى احنا بناكله
ده كله يجيب ياس
وبتتكلمو عن التغيير يبقى ازاى
انت شايف انها تبدا من تغيير نفسك
انا معاك
والحكومة
ولا اقلك مش هتكلم عن الحكومة
مش ناقصة
بس انت بجد
فكرتك روعه

Ahmed Al-Sabbagh يقول...

نظرا لتميز مدونتك تمت أضافتها لدليل الصباغ للمدونات

===============================

شاركنا الشعب الأمريكى أحزانه على ضحاياه فى ذكريات سبتمبر/أيلول الأليمة

لكن دعونا نُذّكر العالم بالجرائم الأمريكية التى أرتكبتها الولايات المتحدة ضد أبرياء وأطفال ومدنين

شارك وأدعم فكرة تخصيص يوم 30 أكتوبر يوما للجرائم الأمريكية


أحمد الصباغ

عاشقة الوطن يقول...

السلام عليكم

ازيك ياشريف
ايه اخبارك

الاول الحوار اللى بينك وبين مروة حوار جميييييييييل جدااا
وكمان انا استفدت

انت عارف لو فعلا كل مجموعة عملت زى ماانت بتقول اكيد هنحل مشاكلنا الكتيييير اللى بتقابل الشباب اللى بتجبرهم انهم يسافروا يشتغلوا برة ولا يروحوا بلد وممكن يتهانوا فيها عشان مش لاقيين لقمة عيش فى بلدهم

مثلا فكرتك ديه ممكن اقولك انها تعتبر أطبقت بس مش بالظبط يعنى
يعنى انا مشتركة فى أسرة فى الكلية ومروة جمعة زارتنا قبل كده
الأسرة ديه بنحاول نعمل فيها اللى نقدر عليه وكل واحد مسئول عن المنطقة او البلد اللى هو فيها
وربنا بيبعت لينا الخير من عنده
طبعا المساعدات اللى بتقدم للناس بتكون للناس الفقرا والايتام والغلابة
وبنحاول على قد ما نقدر نعمل اللى ربنا بيقدرنا عليه
والحمدلله بقي لينا فرع فى اسكندرية وحاليا لسه بدأ الفرع بتاعنا فى القاهرة يشتغل
وكمان ان شاء الله قريب هيكون فيه فرع فى الصعيد
يعنى احنا كمجموعات بنحاول كل واحد فى منطقته يشتغل ويعمل ويوفر المساعدات اللى يقدر يوفرها للمحتاجين
يعنى الفكرة قريبة شوية تقريبا من فكرتك

انت فكرتك ان كل مجموعة متخصصة فى حاجة تشتغل وتساعد وتعمر
احنا كل مجموعة بس بعيد عن التخصصات

مش عارفة قدرت أوصلك فكرتى وكلامى ولا لأ
بس بجد الحوار اللى بينك وبين مروة جميل بجد
وانا استفدت منه بجد

تحياتى ليك ياشريف ولمروة الجميلة حبيبتى
معلش طولت عليك فى الكلام ورغيت كتير
:D
وعلى فكرة انت اخر مرة زورتنى فى المدونة قولتلى انك متعرفش اسمى
كده انت زعلتنى :((

انا اسمى رضوى
ماشي ياعم شريف

سلااااااام

only spot يقول...

جميله اوى افكارك مجتمع مدنى قائم على الجهود الاهليه
مجتمع اساسه الرحمه والعطاء
بس يا ترى الافكار ديه فى الوقت الحاضر قابله للتنفيذ؟
صدقنى انا مش متشامه بس تعالى نحسبها بالعقل
انت كنت صح لما قلت ان لازم نعيد احياء دور رجال الدين من تانى والمثقفين وكل حسب تخصصه طيب وهل من مصلحة الحكومه ده
الحكومه فى الوقت الحاضر ما صدقت انها توصل لحالة الجمود الى وصلنا اليها فى الوقت الحاضر وده طبعا عشان السيناريو الفاشل بتاع التوريث والى واضح انه هيتنفذ تيجى انت بقى وتقولى اننا نروح ونتكلم معاهم طب اقولك دليل على كلامى
فيه قاعده مهمه جدا للحكم على درجة رقى اى بلد ودرجة تحضرها الا وهى فاعليه نظام تعليم هذا البلد انظر بقى لنظامنا التعليمى ومدى رقى شعبنا على فكره دايما من الضيق بيكون الفرج بالرغم القرف الى احنا عايشين فيه بس انا واثقه ان ساعات التوبه بتيجى بعد المعصيه الشديده جدا والى احنا فيه اسوأ حاله وصلنا اليها بس اكيد هيكون فيه امل
بس الفرج شكله كده هيتحقق بعد ماتطبق نظرية النسف الى قامت عليها الثوره الفرنسيه
بجد لو تقدر تروح تتكلم مع حد من رؤساء الحى وتشرحله الفكره يا ريت بس نصيحه وانت رايح خد معاك شهاده من دكاتره كتير تقر بصحة عقلك علشان انت عارف حكومتنا الجميله قد ايه بتحترم العقول وبتشجع الابتكار وحاول وانت بتكلمه تبقى هادى وكمان خد معاك برشام كتير للضغط
يلا ربنا يوفقنا كلنا لما يحبه ويرضاه تحياتى

Soooo يقول...

وكتاب الله انت عسل
وطيب قوي
اقولك على حاجه
روح لمتخذي القرار
اطلع كده وانت لابس شيك واركب تاكسي وقوللو اطلع بينا عالقسم .. هيقوللك ليه يابيه ده انا غلبان وعندي عيال
بلاش القسم .. اطلع على مجلس الحي .. وقول انا عايز اقابل المسئول هنا .. لو قابلته ليك اللي انت عايزه
ولا اقولك .. روح لشيوخ المساجد اللي حواليك وقوللهم عايزين نعمل حاجه ونصلح نفسنا كشباب .. هيقولولك المشكله ان الخطبه بتاعة يوم الجمعه بتيجي من امن الدوله
ولا اقولك .. اطلع على مديرية الامن .. وقوللهم انا عايز اقابل اي حد كبير هنا .. هتقابل فعلا
بس وانت في اوضه ضلمه ومش شايف اي حاجه



بص ياباشا الكلام النظري جميل جدا
بس شوف كده مين اللي مستفيد من اللي بيحصللنا من تخدير فكري واعلامي وعلى كافة المستويات
على فكره
انت طيب قوي وكتاب الله



سلاموووووووووز

على باب الله يقول...

بوست جميل جداً و مدونة رائعة
و فعلاً أحسن من أننا نقعد نلعن الظلام .. أننا نولع شمعة

فبركة يقول...

ra7eel
-----------------------------------
ميرسى جدا على ردك المطول وده بيدل إنك فعلا قريتى البوست كله،وتفاعلتى معاه وماعندكيش فكرة ده أسعدنى قد أيه
بخصوص دراسة الأمر فأعتقد إن الموضوع ده بالذات يحتاج لزمام المبادرة دون اى دراسة لأن الواقع بالفعل مليء بالصدمات والمشكلات المحبطة
عشان كده انا شايف إننا نبدأ وبعدين نشوف مين يقدر يعمل أيه
ولما يكون فى حماس نبدأ ندرس بجد
أتمنى فعلا الكل يشترك ةعلى فكرة تجربة صناع الحياة تجربة غير مسبوقة وناقصنا إننا نعممها فعلا
ربنا يكرم

فبركة يقول...

rainbow
-----------------------------------
متفق معاكى تمام إن محدش هيسمح بوجود أى قائد
أحتا أتعودنا دايما نلخص كل ملامح القيادة فى شخصية واحدة نصنع منها إله أو نصف إله
ومتفق معاكى إننا نبدأ على الأقل فعلا بالأعمال الخيرية وربنا يقدم ما فيه الخير

فبركة يقول...

تامر حسين
-----------------------------------
ميرسى لمجاملتك الرقيقة بس ده لا يعفيك من الرد مرة أخرى بعد أن تكون قرأت البوست كله
كلك زوق

فبركة يقول...

كاميليا
-----------------------------------
محدش قال يا كوكى إننا نترك أعمالنا ونتفرغ للعمل الخيري
يكفى أن نساهم بيوم فى الأسبوع
إن شالله حتى ولو ساعة فى الأسبوع
ساعة هنفيد فيها غيرنا وهنستفاد فى نفس الوقت من مساعدة غيرنا لينا
وكل واحد يساعد بالشكل المناب لقدراته وإمكانياته
وفعلا مساهمة الشركات والاتحادات والكيانات العملاقة فى التجربة سيضيف الكثير من الجدية و القدرة على التنفيذ
ويجعله عامر

فبركة يقول...

حودة الحلاق
-----------------------------------
صدقنى عمرك ما هتكون بتنفخ فى قربة مقطوعة..مع المثابرة والمجهود أكيد هيكون فى تطوير وتقدم
ومفيش حل تانى أسرع لأن التراجع الرهيب اللى حصل فى مسيرة مصر فى عهد كومة البهوات اللى خربوها وقعدوا على تلها لن يجدى معه أى حلول أخرى أفضل أو أسرع
وما تقلقش على قفا الزبون اللى فى أيدك
لأن مفيش قفايات بتتحمل قد قفايات المصريين
وعجبى

فبركة يقول...

esraa
-----------------------------------
فعلا الفكرة صعبة بس مش مستحيلة
والحلم ما هو مستحيل مادام تحقيقه مباح
والليل إن صار طويل أكيد من بعده صباح
والعنب العنب العنب
وسلمى على الحكومة المصرية

فبركة يقول...

حرية الفكر والإبداع
-----------------------------------
صديقى من الصعب جدا لملمة هؤلاء الشباب حديثى التخرج للعمل الميدانى الاجتماعى الغير مجدى بالنسبة لمستقبلهم لان هؤء محتاجون اصلا للمساعدة حتى لو كان فى الطب او الهندسة او غيرة فمن الصعب- براى- ان يقبل اى واحد من الذى ذكرتهم ليقوم مقام الحكومة التى هى مسؤلة بالاساس عن قوة اقتصاد البلد وعن تشغيل العاطلين ونشر الخير والمنفعة على الجميع نحن لا نريد ان ننصل هؤلاء من مسؤلياتهم لان فى ذلك تقليل فى حقك -- الجميع يحب ان تكون دولتة او حكومتة حكومة قوية لا تتدخر جهدا لمنفعة الناس لان هؤلاء الناس هم منهم وهم من الناس فتصير بذلك المنفعة للجميع

كلامك مش صح مع إحترامى الشديد لحجتك ومنطقك
بس أسمح لى أقول لك إنى تعاملت مع الحكومة من منطلق إستغناء المريض عن الدكتور العاجز الذى لن يخفف ألامه
كلامك عن دور الحكومة صحيح ولكن لا يتم تطبيقه وليس من المنطقى أن نضع أيدينا على خدودنا ونقف مكتوفى الأيدى فى إنتظار عدالة السماء
إن الله لا يغير ما بقوم حتى يغيروا ما بأنفسهم

فبركة يقول...

شهروزة
-----------------------------------
منورة البلوج يا غالية يا بنت الغالى مع إنى ما أعرفوش

أنا شايف إننا نخوض التجربة ونشوف بنفسنا هل هما فعلا مستفيدين بحالة التعفن الفكرى التى أصابت المصريين أم أن ما يحدث من منطلق جهل وغباء إدارى
لو اللى بيحصل ده عن عمد يبقى هحاربهم وهفضحهم و...وهكنس عليهم السيدة
وأكشف راسى وأدعى عليهم دعوة ولية ساعة مغربية
ويا ويلهم من دعوة المظلوم التى ليس بينها وبين الرحمن حجاب

وش بيغمز

فبركة يقول...

عالية حليم
-----------------------------------
وماله لما النت يتقطع يا لولو
اللى خلى الميا تتقطع بالشهور مش هيخلى النت يتقطع طول شهر رمضان
عموما منتظر ردك

فبركة يقول...

yotta
-----------------------------------
شوف أنا كمان بقعد اتكلم كتير فى لحظات تجلى وصفا وتفاؤل مع اصحابى عن الموضوع ده
ولازم نعمل حاجة عشان نصلح الحال
لكن بارجع واقول
يا بت مافيش وقت
خليكى ف نفسك
وفكرى ف مستقبلك وابنيه يادوبك تلحقى
يمكن يكون نوع من الانانية
لكن انا شايفاه واقعيه

والله دى مشكلتنا كلنا يا يوتا لأن كلنا فعلا أنانيين
ولما فعلا يبقى قلبنا على بعض ونحس بألام بعض
ونفكر فى حل مشاكل بعض يبقى ساعتها فى أمل إننا نفرمل قطار الهاوية اللى راكباه مصر وبيرجع بيها للخلف بسرعة الصاروخ

فبركة يقول...

son's egypt
-----------------------------------
فعلا إحنا محتاجين لثورة على نفسنا
لأن مصر مش ناقصة ثورات عسكرية ولا شعبية تسال فيها أنهار من الدم المصرى المطحون
مثلما حدث فى الثورة البلشيفية

ناقصنا نقف وقفة بضمير قدام المرايا

فبركة يقول...

لازم يكون الشخص اللى بيعتمد عليه في عملية الاصلاح فيه شوية مواصفات
فمن رايي مينفعش اروح اجيب شباب الجامعة و اقنعهم بعمل تتطوعي لان حتي لو وافقوا هنقابل مشاكل بعد كدة زي :
عارف لو جبت شاب مصري مطحون النهاردة ميعرفش الالف من كوز الدرة و قررت تظبطلة حياتة شوية علي سبيل المثال لا الحصر بأستخدام علوم التنمية البشرية او حتي كان من جماعة منظمة زي الاخوان . هيحس بانة بقى عالى و خد بالك من التغير في اسلوب التعامل و السلوك لانه هيبقي احسن اه , بس هيبقي اشبة بسلوك نجم سينمائي مش سلوك مواطن المفروض انه كدة بقي طبيعي و المشلكة دي ليها حلين يا نغير طبقات علي بعضها يا يبقي الشخص المعتمد عليه او اللي هيتغير دة فاهم كويس اوي ان دي مجرد خطوة في مشوار اكتر من مليون خطوة علشان بلد و انه كدة بقي طبيعي مش بقي متميز

كلامك عجبنى اوى وفعلا فى ناس كتير لما بتشارك فى فعل الخير بتحس إنها بقت خلاص حاجة كبيرة وممكن كمان تتكبر على اللى حواليها بإعتبار إنهم عملوا حاجة كبيرة
مع إن الأصل فى التعامل إننا نسعى لفعل الخير ومساعدة الأخرين
عموما بما إن طلبة الجامعات والخريجين مش متعلمين كويس مش معنى كده إننا ما نعتمدش عليهم
بالعكس
المفروض نديهم الفرصة يتعلموا صح ويمارسوا الشغل صح
على فكرة حتى لو شاركوا فى عملية الإصلاح بأجر رمزى هيكسبوا كتير جدا لأن الناس اللى محتاجة عددها كبير وبالتالى كذا واحد هيدفع مبلغ رمزة ومبلغ على مبلغ هيعمل مبلغ كبير
وعن طريق كل ده هنستغنى عن مبدأ الفهلوة والفبركة
ونبدأ فى خوض المسيرة بشكل علمى ومنهجى
بعيدا عن البتنجان اللى إحنا فيه
هو صحيح كيلو القوطة بقى بكام؟؟؟!

فبركة يقول...

doha
-----------------------------------
لو أكلك برد بسببنا فدى مشكلة محلولة لأنك تقدرى تسخنيه
أما لو سيبتى البوست وما قريتيهوش بسرعة فدى مشكلة مالهاش حل
لأن البوست بتاعى سريع التلف ولا يؤخذ إلا طازة
لو الناس عندها يأس وإحباط زى مانتى بتقولى يبقى لما يشوفوا ناس غلابة بتتحل مشاكلهم وشباب زى الورد بيحاول يساعدهم أكيد ده هيخليهم ينشكحوا ويرفع من روحهم المعنوية
وباتالى المجتمع هو اللى هيعالج يأسه بنهوضه من كبوته ويصحح أخطاءه بشكل عملى إيجابى بعيدا عن الحكومة البتنجانية المبجلة
هل أقصد حكومة نظيف؟؟؟
الإجابة لا فحكومة نظيف أقل من أن توصف بالحكومة ..فهى مجموعة من مبرمجى الكمبيوتر لتنزيل ويندوز صالح لرجال الأعمال فقط
ولا يعرف الفقراء الباسوورد الخاص به

فبركة يقول...

عاشقة الوطن
-----------------------------------
والله العظيم لولا الملامة لكنت أتحزمت ورقصت عشرة بلدى
للأسف مابعرفش أزغرط يا رضوى
حقيقى فرحان جدااااااااا بنشاطك أنتى وأسرتك
فعلا تجربة هايلة ويا ريت يتم تعميمها على مدار مختلف كليات ومعاهد وجامعات مصر
هى فعلا شبه فكرتى بس فكرتى على شكل موسع
مين عالم
يمكن انا وأنتى فى يوم من الأيام نكون زملاء فى نشاط اجتماعى واحد
وكله فى ميزان حسناتنا
ربنا يكرم يا رب
ويهدى
قادر يا كريم
اللهم إنك عفو تحب العفو فأعفوا عنا

فبركة يقول...

only spot
-----------------------------------
متفق معاكى إن نظام تعليمنا الفاشل لازم يتغير
لكن غير متفق معاكى على اعتمادنا على مبدأ النسف اللى قامت عليه الثورة الفرنسية

أصلك مش متخيلة حمامات الدم الرهيبة اللى حصلت فى الثورة الفرنسية والثورة البلشيفية
وثورة الموريتانيين ضد شاوسسكو

كلها ثورات قضت على الألاف وربما الملايين
أكيد رحمة ربنا أكبر من إن مصر يحصل فيها كده
أكيد إحنا مش عايزين بلدنا تضيع ويموت فى ثورة شعبها أبويا وأبوكى وأمى وأمك وأخويا واخوكي وأختى وأختك

أكيد لازم نحاول نغيرها بالأدب والفكر المستنير والعقل السليم

فبركة يقول...

soooooooooooo
-----------------------------------
وكتاب الله المجيد أنت متفائل أوى
وشايف الدنيا من منظور وردى ع الآخر
وعايز تخلينى أتفائل زيك
بس لا يا عم
خلينى متشائم ومفترض سوء النية فى الحكومة والشعب
واخد لى بالك يا عم المتفائل ياللى كلامك ده لا بيدل على الإنهزامية أو الاستسلام ولا حاجة من دى لا سمح الله
خليك فى تفاؤلك اللى فعلا هيغير شعب مصر

صبح صبح يا عم الحاج

فبركة يقول...

على باب الله
-----------------------------------
عاجبانى أوى صورة نجيب الريحانى اللى أنت حاططها دى
بجد أنت عبقرى
وشكرا يا باشا على زيارة مدونتى المتواضعة بس للأسف ماعنديش شاى ولا قهوة من اللى بتقدمهم مدونتك
عموما فى النهاية انا متفقك معاك تماما إننا لازم نولع الشمعة عشان نبدد بيها الظلام
مين عالم؟؟
يمكن بكرة تكبر وتبقى بطارية 12 فولت
الله اعلم

klmat يقول...

استاذ شريف
احييك من قلبى على مجهودك وتفكيرك
بالأعتماد على نفسنا ونبدأ بالتنميه
الفكره رائعه فكرتنى ببرنامج
عمروخالد صناع الحياه
بس محتاجه دعايه قويه
فىشباب كتير متحمس وعايز يعمل حاجه
بس دول مطحونين فى اكتر من عمل
علشان غلاء المعيشه
المهم البدايه
وربنا يوفقنا جميعا
لعمل اى حاجه ايجابيه
تحياتى لك

بصمات يقول...

ازيك يا شريف ...
شوف يا عمنا النظرية فعلا جامدة والتطبيق هو اللى صعب ، تعرف انا مش مصرى بس اول ما قرات كلامك حسيت انى محتاج انقل الكلام ده كمان لاولاد بلدى ونخلى النشاط عربي ، لاننا بصراحة فى نفس القفة كلنا فى كل البلاد مش فى مصر وبس ...انا عاوزك تدخل عندى فى موقع العين الثالثة للادب الساخر وتشوف كمان التعليقات اللى هتحصل من الناس اللى عندنا لما انقل ليهم كلامك وتشارك معاهم كمان ...انا صحفى من ليبيا " محمد زيدان " وسعيد بالتعرف عليك ...ملاحظة اسف لانى غيرت كم كلمة فى موضوعك فى النقل لان بصراحة مافيش عندنا " كنيسة " ولا فى عندنا مدرية امن القاهرة " ..