فبركة

المقالة الافتتاحية يا جدعان

كل ما أفتكر كلام عادل إمام فى ذلك المشهد العبقرى فى فيلم عمارة يعقوبيان لما قالت له هند صبرى بقلق وتوتر وطى صوتك يا باشا الناس بتبص علينا " فيرد عليها بعصبية وحرقة ( أجزم أنها خرجت من القلب وكأنها بلسان عادل إمام نفسه وشخصيته الحقيقية ) عندما صرخ وقال" يبصوا عليا أنا ليه.. يبصوا ع العماير اللى كانت أحسن من عمارات أوربا ..دلوقت بقت مزابل من فوق ومن تحت بقت مسخ..إحنا فى زمن المسخ" عندها اشتعلت صالة العرض بالتصفيق الحار " رغم تفاوت المستوى الثقافى والاخلاقى للجمهور , ورغم إن منهم اللى ما يعرفش يعنى أيه كلمة " مسخ " من أساسه،لكن اللى بيخرج من القلب بيوصل للقلب على طول،ورغم إن فى ناس كتير مش عارفة يعنى أيه " مسخ " لكن على الأقل حاسين بيها على أرض الواقع المخصية ..
فعلا إحنا فى زمن المسخ..زمن الفبركة..زمن الحوارات والحوارتجية..وبما إن العبد لله "واحد من الناس زى كل الناس .. ناس عايشة بتجرى وشقيانة وآهى عايشة وخلاص..مستورة مادام بابنا علينا مقفول بالترباس "
وبما إن العبد لله مشروع صحفى فى زمن مفيهوش صحافة،ومعد فى التليفزيون اللى بقت أكتر حاجة تفدنا فيه وتوصل رسالة إعلامية هادفة هى أفلام الكارتون ..
قررت أفبرك على حضراتكم واقول كل اللى فى نفسى ونفسكم ..
مع فارق بسيط جدا ..
انى هفبرك بعلمكم ومزاجكم واسيب الكل يفبرك براحته ويقول كل اللى على كيفه وانا واثق اننا هنستفاد ونتعلم من الفبركة..لانها فبركة واقعية !!
فبركة خارجة من انسان طول عمره بيفبرك ( غصب عنه ) بعد أن أكتشفت إن الفبركة هى الشيء الوحيد اللى بنعمله بضمير!!
اوعدكم انى مش هفبرك عليكم واخدعكم بحجة إن الإعلام رسالة مقدسة،وإن المضمون لازم يكون مفيد ومهم,وعلى حس الرسالة المقدسة أفضل أحط وأرص كام كلمة مجعلصة على كام احصائية مضروبة من باحث ضرب البيانات وهو قاعد ع القهوة من غير ما ينزل للمبحوثين ويسألهم بصدق,وفى الآخر يطلع احصائية خايبانة تضلل الناس, وافضل ارغى واعيد وازيد فى كلام فارغ وشعارات قديمة الناس خلاص حفظتها،وبقت تكررها على سبيل إنها نكتة ، أو إفيه !!
اوعدكم انى مش هدس السم فى العسل عشان اضلل الناس مش لأنى عندى ضمير،وأمانة ، لكن لأن الناس خلاص مبقتش عبيطة,والعيل الصغير بقى عارف " الكفت " زى ما بيقولوا , واللى يفكر يضحك ع الناس ويشتغلهم , بقوا يشتغلوه ويعملوا نفسهم مقتنعين ومصدقين , ويفضلوا يضحكوا فى سرهم وعلانيتهم ، ويفضل هو الوحيد اللى عبيط !!
أوعدكم إنى مش هطبل وأزغرت للحكومة ، وسياساتها الحكيمة , وقراراتها الرصينة ، وأبشركم ببشرى لن تتحقق,ونبؤات لن تهبط يوماً من السماء على أرض الواقع .
كل اللى هعمله إنى هفبرك عليكم,واشتغلكم .. بس بمزاجكم بدل ما غيرى بيفبرك علينا ويتشغلنا غصب عنا..ما هى فبركة بفبركة بقى, ويانا يا القراء فى أم المدونة دى بقى ..